Sergjani mundet të bëhet edhe babadimër por, ai është veç anëtar kuvendi

/2L ONLINE/ – Fakti që anëtari i Kuvendit Komunal të Gjilanit nga komuniteti serb Sergjan Mitroviq, është pjesë e strukturave paralele pasi ai ditë më parë është zgjedhur edhe ”Kryetar i Gjilanit”, strukturë paralele me seli në fshatin Kufcë të Gjilanit, po vazhdon të komentohet nga faktori shqiptar. Kryesuesja e Kuvendit Komunal Valentina Bunjaku- Rexhepi shprehet për Portalin 2LONLINE se nuk e meriton kjo çështje të ketë pompozitet të tillë megjithatë, mendimi i saj është që Sergjan Mitroviqi vazhdon të jetë anëtar i Kuvendit Komunal të Gjilani, si i zgjedhur që përfaqëson komunitetin e tij dhe se i tillë do të jetë derisa të vazhdojë të respekton punën e Kuvendit, rregulloren dhe ligjin për qeverisje lokale mbi të cilat punon ky organ më i lartë në Komunë, i cili zgjedhet në mënyrë të drejtpërdrejtë nga qytetarët, në pajtim me ligjin për zgjedhjet lokale.

Kryesuesja Bunjaku-Rexhepi tha tutje se Mitroviq do të trajtohet si gjithë të tjerët që janë pjesë e Kuvendit, sepse është anëtar i këtij organi ndërsa ajo se çfarë bënë në jetën private jashtë punës së kuvendit është çështje e tij.

“Ai mundet atë kohë të tij ta kalojë edhe duke vrapuar, apo mund të bëhet edhe babadimër, dhe në këto festat e fundvitit t’i urojë qytetarët e Kuvcës, thjesht ai kohën e lirë mund ta shfrytëzojë si të dojë vet, të vet shpallet e të vetzgjidhet, por unë do ta respektojë rregulloren e Kuvendit dhe ligjin për vetëqeverisje lokale dhe konform kësaj do të veprojë”, ka thënë Bunjaku-Rexhepi.

Ndërsa, sa i përket reagimit të opozitës për këtë çështje, kryesuesja Valentina Bunjaku-Rexhepi , tha se opozitën nuk mund ta brengos ky fenomen ma shumë se pozitën, por atë si kryesuese nuk i bënë përshtypje kjo vetshpallje se nuk vlen.  “Andaj suksese e shëndet, për kohën e lirë ku e kalon Sergjan Mitroviq. Mua kjo nuk më hyn në punë por ai në Kuvend duhet ti respektojë ligjet e Republikës së Kosovës sepse me këto ligje duke i respektuar ka marr votat për asamble”, ka thënë kryesuesja Bunjaku-Rexhepi. /2L ONLINE/