Sergjan Mitroviq, edhe me ne, edhe me ata?!

/2L ONLINE/ – Sergjan Mitroviq, këshilltar në Kuvendin Komunal të Gjilanit nga komuniteti serb, është zgjedhur kryetar i të ashtuquajturës Komunë paralele e Gjilanit, e cila gjendet në fshatin Kufcë të Gjilanit. Mitroviq është emëruar si kryetar i organit të përkohshëm, pasi që është shkarkuar kryetari i përkohshëm i komunës paralele, Zoran Stojkoviq.

2L ONLINE, ka kontaktuar në telefon Mitroviq-in, por ai as nuk e ka mohuar të jetë pjesë e strukturave paralele serbe, e as nuk e ka pohuar. Se, Sergjan Mitroviq, është zgjedhur Kryetar i të ashtu quajturës Komunë paralele e Gjilanit, me procedurë të rregullt dhe për këtë ekzistojnë dëshmi në gazetën zyrtare dhe Portalin e Qeverisë së Serbisë. Por, Mitroviq, edhe në një emision të Radio Televizionit serb PULS, ka pranuar se ‘’para tri ditëve rreth orës 14:00 është bërë pranim dorëzimi i detyrës’’, duke ftuar të gjithë serbët ‘’që ti drejtohen Komunës në fjalë për të shfrytëzuar shërbimet e këtij organi me seli në Kufcën e Epërme’’.

Sërish jemi munduar të kontaktojmë me Mitroviqin, mirëpo ky i fundit nuk na ka hapur telefonin, madje pas disa minutash ai e ka fikur plotësisht telefonin. Ndërkohë ekipi ynë ka udhëtuar drejt fshatit Kufcë ku aty gjendet objekti i Komunës paralele të Gjilanit dhe jemi munduar të marrim një prononcim, mirëpo edhe pse Mitroviq-i gjendej në punë, neve nuk na është lejuar të flasim me të sepse sipas punëtorëve, ai është i nxënë në një takim si dhe pret një delegacion nga Serbia.

Se Sergjan Mitroviq-i është zgjedhur Kryetar i Komunës paralele të Gjilanit, është njoftuar kryesuesja e Kuvendit Komunal të Gjilanit, Valentina Bunjaku-Rexhepi, e cila ka theksuar se “në bazë të rregullores në fuqi ka procedura që duhet të respektohen dhe nëse këshilltari në fjalë është pjesë e strukturave paralele serbe, do të shikohet mundësia e  procedurave per shkarkim”.

/Edona JERLIU/