Semimaturantët e SHFMU “Nazim Hikmet” njoftohen me drejtimet profesionale që ofron SHMAT “Sahit Baftiu”

Nxënësit e klasave të nënta të ShFMU “Nazim Hikmet” në Dobërçan, patën mundësinë të ndjekin një prezantim informues për drejtimet profesionale që ofron Shkolla e Mesme e Agrobiznesit dhe Teknologjisë “Sahit Baftiu “, Gjilan.

Siç njoftojnë drejtuesit e shkollës së Dobërçanit, ky aktivitet shërbeu si një udhërrëfyes i qartë për orientimin e tyre të mëtejshëm arsimor dhe profesional, duke theksuar rëndësinë e zgjedhjes së duhur në këtë fazë vendimtare.

Gjatë prezantimit nga ana e dy profesoreshave të kësaj shkolle u paraqitën profilet në fushën e agrobiznesit, si: Kuzhinieri, Teknologji Ushqimore, Agrobiznes, Hortikulturë dhe Mbrojtje e Bimëve, si dhe profili Laborant i Biologjisë. Këto drejtime përfaqësojnë fusha me perspektivë të lartë zhvillimi dhe kërkesë në rritje në tregun e punës, duke ofruar mundësi reale për punësim dhe avancim profesional.

“Zgjedhja e këtyre drejtimeve nuk është vetëm një hap drejt shkollimit të mesëm, por një vendim strategjik për ndërtimin e një karriere të suksesshme. Përmes përkushtimit dhe angazhimit, nxënësit kanë mundësinë të shndërrojnë potencialin e tyre në arritje konkrete dhe të qëndrueshme në të ardhmen”, thuhet në njoftimin e ShFMU “Nazim Hikmet”.  /2LONLINE/