Semaforët që nuk ndihmojnë aspak komunikacionin (video)
Shkruan: Sytrim Syla
/2L ONLINE/ – Për çdo vit, me ardhjen e bashkatdhetarëve fillon dhe shumëfishimi i veturave në komunikacion dhe jashtë tij, gjë e cila po e vështirëson mjaftë shumë lëvizjen e qytetarëve. E për këtë, unë si shumica e qytetarëve të Gjilanit, realizimin e projektit për sinjalizimet vertikale me padurim e kemi pritur. Duke shpresuar që ky projekt do të mund të stabilizonte gjendjen e parvjetshme në komunikacion. Por, tash e dy vite nga ky realizim të priturat tona sa shkojnë e zbehen.
Sinjalizimi vertikal i vetëm i vendosur në komunën tonë, tek qendra e qytetit sikur ka kaluar kohë e gjatë e nuk janë testuar nga profesionistë, sepse po të ishte e kundërta e kësaj, nuk do të përballeshim me gjendjen e tanishme të tyre. Sa i përket programimit të këtyre semaforëve, konkretisht në korsin e rrugës “Adem Jashari” që vie nga shkollat e mesme për te semaforët, 64 sekonda i janë dedikuar ndalimit të veturave, 4 sekonda të tjerë përgatitje për nisje ndërsa vetëm 18 sekonda kalim i lirë, e kjo e fundit aspak nuk është e kënaqshme kur dihet që gjatë këtyre muajve të verës dëshirojmë që angazhimet t’i përfundojmë në kohë sa më të shkurtër sepse temperaturat e larta nuk do mund t’i përballojmë duke pritur aq gjatë rrugëve të qytetit për shkak sinjalizimeve në rrugë dhe koordinimit, shofer- këmbësor.
Por nëse do të rikonstruktoheshin numërimet e ndalesave apo të lëvizjes së lirë në semaforin, i cili rregullon dendësinë e veturave në rrugën “Adbullah Tahiri” që vie nga ambulanca për te semafori atëherë shoferët do të shpëtonin nga nervozizmi dhe buria e veturave mbrapa, ku fundi i kolonës nuk mund të shihet me sy të lirë. E ndoshta në teori numërimi mbrapshtë i sekondave është në rregull, por në realitet ku këtë praktikë po e bëjmë ne, qytetarët, nuk lë aspak për t’u dëshiruar.
Përkundrazi, është për të ardhur keq që në vend që semaforët të jenë ndihmesë në këtë drejtim ata vetëm sa po e vështirojnë komunikacionin. Prandaj, rekomandimi im për zgjidhjen e këtij problem është që sa më parë të bëhet rishikimi i programimit të semaforëve për ndalesë tek veturat dhe këmbësorët. /2L ONLINE/