Selami Zylfiu nderohet me mirënjohje për kontributin në shërbimin civil

Ushtruesi i detyrës së Udhëheqësit për Buxhet dhe Financa, njëherës zyrtar certifikues në kuadër të Drejtorisë për Buxhet dhe Financa në Komunën e Kamenicës, Selami Zylfiu, është nderuar me mirënjohje nga Ministria e Digjitalizimit dhe Administratës Publike, në shenjë vlerësimi për përkushtimin, profesionalizmin dhe kontributin e tij në shërbimin civil.

Në ceremoninë e mbajtur në Prishtinë, me rastin e Ditës Ndërkombëtare të Shërbimit Publik, mori pjesë edhe nënkryetarja e Komunës së Kamenicës, Arta Bajralija, e cila shoqëroi zyrtarin Zylfiu në këtë ngjarje të rëndësishme.

Mirënjohja për Selami Zylfiun u nda nga Ministri i Digjitalizimit dhe Administratës Publike, Lulëzon Jagxhiu.

Të pranishëm në këtë ceremoni ishin edhe përfaqësues të institucioneve qendrore, përfshirë Kryeministrin e Kosovës, Albin Kurti, i cili vlerësoi lart punën e zyrtarëve të dekoruar, duke theksuar se angazhimi i tyre ndikon drejtpërdrejt në rritjen e besimit të qytetarëve ndaj institucioneve publike.

Selami Zylfiu ka një përvojë të gjatë në sektorin e financave dhe njihet për profesionalizmin, përgjegjësinë dhe përkushtimin e tij në kryerjen e detyrave, duke dhënë një kontribut të çmuar në administratën publike.  /2LONLINE/