Sekretari i Ministrisë së Mbrojtjes dhe Dekani i Fakultetit të Inxhinierisë Elektrike dhe Kompjuterike nënshkruan marrëveshje bashkëpunimi
Sekretari i Përgjithshëm i Ministrisë së Mbrojtjes, Gafurr Dugolli dhe Dekani i Fakultetit të Inxhinierisë Elektrike dhe Kompjuterike (FIEK), prof. dr. Isak Shabani, nënshkruan sot një marrëveshje bashkëpunimi, nëpërmjet të cilës synohet rritja e bashkëpunimit reciprok në zhvillimin e programeve të përbashkëta studimore, rritja e kërkimit shkencor dhe trajnimeve praktike.
Me këtë rast, Sekretari i Përgjithshëm i MM-së, z.Dugolli u shpreh se kjo marrëveshje krijon një urë të qëndrueshme mes institucioneve shtetërore dhe akademisë, në shërbim të avancimit të kapaciteteve vendore në fushën e sigurisë kibernetike si dhe teknologjisë së informacionit dhe komunikimit.
“Ky është një investim i drejtpërdrejtë në të ardhmen – në ngritjen e kapaciteteve, rritjen e ekspertizës vendore dhe krijimin e një mjedisi ku teknologjia shfrytëzohet për mbrojtje, zhvillim dhe progres”, u shpreh mes tjerash Sekretari i Përgjithshëm i MM-së.
Me këtë marrëveshje krijohen mundësi të reja për studentët dhe profesionistët e rinj që të angazhohen në projekte konkrete dhe laboratorë praktikë, duke forcuar rolin e vendit në ekosistemin global të sigurisë dhe inovacionit teknologjik. /2LONLINE/