Seanca solemne për nderë të Epopesë së UÇK-së: Fjala e Bujar Nevzatit

Seanca solemne për nderë të Epopesë së UÇK-së: Fjala e Bujar Nevzatit, anëtarit të Kuvendit komunal të Gjilanit (Partia Demokratike e Kosovës PDK)

Njëzetë e shtatë vjet më parë në Prekaz, Jasharët me Komandantin legjendar Adem Jasharin në ballë u bënë modeli më i jashtëzakonshëm që ishte parë ndonjëherë në luftën për liri.

Më 5,6 e 7 Mars, njëzetë e shtatë vjet më parë në Prekazin e Jasharëve mori frymë Liria e Kosovës; mori hov rrita e UÇK-s, dhe shqiptarët kudo, gjetën modelin që duhej ndjekur për të jetuar si njerëz të lirë në atdheun e lirë.

Kosova e Jasharëve të Prekazit e qindra heronjve të tjerë, tashmë shtet i pavarur e demokratik, secilit hap e veprim të saj duhet t’i vëjë përballë heroizmin e Jasharëve, sepse vetëm po e pamë madhështinë e heroizmit e aktit flijues të tyre do të jemi të sigurt në veprimet tona sot dhe kurdo.

Kosova, njëzetë e shtatë vjet pas rënies heroike të Jasharëve ende ka nevojë për frymëzimin që ata falin; ende ka nevojë ta ndjejë zgjuar ëndrrën e tyre; ende ka nevojë për dritën që ata falin.

Kosova pa Ademin e Hamzën; pa UÇK, do të ishte së paku pa LIRINË e saj, prandaj t’i kujtojmë e nderojmë, t’u falemi e falënderohemi për secilën ditë liri që e gëzojmë. T’u përkulemi të rënëve e të nderojmë të gjallët që ende paguajnë çmimin e lirisë tonë.

Lavdi e përjetshme Jasharëve e Prekazit!

Lavdi e përjetshme UÇK-s!

Ju faleminderit!