SC Gjilani: Me përfundimin e kontratës përfundoi edhe bashkëpunimi me mesfushorin Sabit Bilali
SC Gjilani ka bërë me dije se me përfundimin e kontratës, përfundoi edhe bashkëpunimi me mesfushorin nga Tetova, Sabit Bilali, i cili u paraqit në 65 ndeshje kampionale dhe katër ndeshje të kupës me fanellën kuq e bardh, duke shënuar edhe tre gola.
“Sport Club Gjilani e falënderon Sabit Bilalin për kontributin e dhënë gjatë kohës së kaluar në klub, duke i uruar shëndet dhe suksese në vazhdimin e karrierës së tij sportive. Klubi dëshiron ta falënderojë Bilalin për përkushtimin, profesionalizmin dhe kontributin e dhënë gjatë periudhës sa ishte pjesë e familjes së Gjilanit. Angazhimi dhe korrektësia e tij kanë qenë të vlerësuara nga bashkëlojtarët, stafi dhe tifozët tanë”, thuhet në njoftimin e klubit “kuq e bardh”.
SC Gjilani i ka uruar futbollistin shumë suksese në vazhdim të karrierës së tij, shëndet dhe arritje në çdo hap të rrugëtimit të tij profesional. /2LONLINE/