SC Gjilani e falënderon Edison Kqikun për kontributin e dhënë gjatë kohës së kaluar në klub

Sport Club Gjilani e falënderon futbollistin Edison Kqikun për kontributin e dhënë gjatë kohës së kaluar në klub, duke i uruar shëndet dhe suksese në vazhdimin e karrierës së tij sportive.

SC Gjilani bënë me dije se me kërkesë të futbollistit, bashkëpunimi është ndërprerë në mënyrë të dyanshme dhe mirëkuptim të ndërsjellët, pavarësisht marrëveshjes kontraktuale, e cila kishte jetëgjatësi të mëtutjeshme.

Kqiku, njëherësh edhe kapiten i ekipit, u paraqit denjësisht për 9 edicione më radhë me fanellën kuq e bardh dhe e djersiti atë plot në 134 takime, duke shënuar pesë gola dhe duke asistuar në tetë raste.

“Duke qenë produkt i akademisë dhe futbollist i rritur në folenë e “Skifterave”, klubi shpreh mirënjohje dhe falenderim të pafund për gjithë kontributin dhe sakrificën e dhënë. Angazhimi dhe korrektësia e tij kanë qenë të vlerësuara nga bashkëlojtarët, stafi dhe tifozët tanë”, thuhet në njoftimin e SC Gjilanit.

Klubi “kuq e bardh”, i ka uruar futbollistit shumë suksese në vazhdim të karrierës së tij, shëndet dhe arritje në çdo hap të rrugëtimit të tij profesional. /2LONLINE/