Rritet bashkëpunimi mes Komunës, Këshillave Lokale dhe Policisë

/2L ONLINE/ – Nënkryetari i Kamenicës Fatmir Matoshi, ka takuar sot kryetarët e Këshillave Lokale dhe udhëheqësit e stacionit policor të Kamenicës për të diskutuar situatën e sigurisë në komunë, brengat e qytetarëve dhe angazhimet e përbashkëta të Këshillave Lokale për Siguri Publike.

Nënkryetari Matoshi fillimisht i ka njoftuar kryetarët e këshillave lokale me aktivitetet dhe punët që po kryhen në komunë në sferën e infrastrukturës dhe ka kërkuar prej tyre që të jenë pjesë e realizimit të këtyre projekteve duke dhënë sygjerimet, propozimet dhe vërejtjet e tyre.

“Ne jemi të kënaqur me angazhimet e Këshillave Lokale për Siguri publike rreth projekteve konkrete që kanë filluar këto ditë të implementohen e që janë donacion i Ambasadës Norvegjeze. Vendosja e kamerave në Gjimnaz dhe në shkollat fillore shqipe dhe serbe në qytet, ndriqimi publik në Lagjet Qamëria e Malësia dhe ndriqimi publik në Karaqevë të epërme, do të përmirësojnë kushtet e jetesës për banorët” tha Matoshi.

Komandanti i Policisë në Kamenicë, Kapiten Nazif Hajrizi, e ka vlerësuar situatën e sigurisë si të qetë e stabile. “ Gjatë kësaj periudhe të vitit 2015 kemi gjithësej 454 raste të raportuara në polici, që është një përmirësim nga viti i kaluar, pasi që kemi 111 raste më pak, dhe kjo është meritë e qytetarëve, Komunës, KLSP-ve, Policimit në bashkësi dhe aktiviteteve të përbashkëta” tha Nazif Hajrizi.

Raportet për sektorët e e veqantë u prezantuan nga zyrtarët e policisë Shukri Shillova e Salih Kosumi.

Kryetarët e Këshillave Lokale, kanë paraqitur kërkesat e tyre që burojnë nga nevojat e qytetarëve e ndër të cilat dominonin ato për infrastrukturë, sidomos në shkolla dhe ambulanta. Këto kërkesa u vlerësuan si të drejta nga nënkryetari Matoshi i cili u zotua se do të angazhohet për realizmin e tyre.

Gjithashtu, kryetarët të pranishmit u informuan se Kuvendi Komunal e ka zgjedhur Fisnik Kastratin si koordinator të ri të Këshillave Lokale./2L ONLINE/