Riola Hysa fituese e çmimit të Festivalit Mbarëkombëtar të Këngës Folklorike “Fest Folk”

Sonte, të Teatrin e Qytetit të Gjilanit, u mbajt për herë të parë Festivali Mbarëkombëtar i Këngës Folklorike “Fest Folk”, një aktivitet në të cilin jehoi kënga nga solistë prej trevave të ndryshme si nga Kosova, Shqipëria, Maqedonia e Veriut e Lugina e Preshevës, nën përcjelljen e orkestrës folklorike autentike gjilanase.

Festivali, i konceptuar si një Folk Festival me rrënjë tradicionale, erdhi nën organizimin e OJQ “Qendra Kulturore Cello Duo”, si një iniciativë e drejtoreshës Arzie Jusufi, në bashkëpunim të ngushtë me partnerin e saj profesional Fazli Berisha si ideator kryesor për nismën e këtij festivali dhe udhëheqësin artistik, instrumentalisti Afrim Leka, ndërsa atë e shpalli të hapur Kushtrim Zeqiri, drejtor i DKRS-së në Gjilan.

Fillimisht, u nderuan me mirënjohje, drejtori Kushtrim Zeqiri, pastaj dy veteranët e kësaj muzike Xhemajl Berisha dhe Fehmi Leka, dhe pastaj moderatorja Lumturie Shabani ftoi në skenë solistët që performuan për më se 1 orë, para të pranishmëve në sallë.

Me që ishte hera e parë e këtij Festivali, në emër të organizatorit, Arzie Jusufi tha se do të jepen tri çmime, me idenë që herëve të tjera të shtohet numri i çmimeve.

Kështu, Riola Hysa ishte fituese e çmimit të Festivalit, çmimi për solistin më të ri iu nda Reis Shala dhe me çmimin solisti më i vjetër u nderua Selajdin Miftari.

Përndryshe, nga organizatorët është thënë se qëllim kryesor i festivalit është ruajtja dhe promovimi i këngës folklorike shqiptare në të gjitha format e saj tradicionale duke i ofruar publikut një përvojë autentike artistike si dhe vendosja e Gjilanit në hartën kulturore mbarëkombëtare me një aktivitet vjetor të qëndrueshëm.  /2LONLINE/