Riad Rashiti: Dorëheqja e kryetarit të komunës ka qenë dhe mbetet shpëtim për Gjilanin

Riad Rashiti, kreu i PDK-së së Gjilanit ka thënë se Kryetari i komunës së Gjilanit ndaj të gjithëve e ka humbur luftën, sot po i lufton gratë profesioniste që kanë dije e guxim, përmes cenimit të sigurisë dhe integritetit të tyre në pozitat udhëheqëse

“Dorëheqja e kryetarit të komunës ka qenë dhe mbetet shpëtim për Gjilanin, këtë e kemi kërkuar nga viti i kaluar përshkak gjendjes së jashtëzakonshme që e ka sjellë ai komunën tonë, ku po mbretëron një tension i paparë brenda institucioneve komunale deri në akte të dhunës fizike për ndërhyrje militanteske të VV-së duke ia thyer cilindrin e zyres saj, në drejtorinë e buxhetit ku menaxhohen 40 milion euro të qytetarëve të Gjilanit”, thotë Rashiti.

Sipas tij, drejtoresha e buxhetit znj.Herolinda Murati Leka është e fundit që është përballur me një kaos institucional, të krijuar nga veprimet e kryetarit të Gjilanit Alban Hyseni dhe e cila sot është detyruar të jap dorëheqje nga pozita e saj, sepse nuk ka mundur të lejojë këtë ndërhyrje fizike të vrazhdë në vendin e saj të punës.

“Dy drejtoresha të Arsimit, dy të Shëndetësisë, e QKMF-së, drejtoresha e Prokurimit, menaxherja e ZKF-së, menaxherja te Urbanizmi, drejtoresha e shkollës fillore Thimi Mitko, të gjitha këto janë përballur me probleme dhe presione të jashtëzakonshme nga kryetari i Gjilanit deri në dorëheqjet e tyre nga këto pozita udhëheqëse. E vetmja që ka mbetë prej drejtoreshave në komunën e Gjilanit është ajo e inspeksionit edhe pse gjendja edhe aty ka qenë dhe është alarmuese”, ka thënë i pari i PDK-së.

Sipas tij, ato gra të ndershmen kanë treguar profesionalizëm, guxim dhe integritet në punën e tyre udhëheqëse dhe kjo i ka penguar këtij kryetari burracak të komunës së Gjilanit.

“Dorëheqja e kryetarit të komunës është një akt i duhur në këtë situatë të jashtëzakonshme të komunës së Gjilanit. Por duke e njohur karakterin e tij dhe mungesës së moralit politik dhe institucional të tij, kjo nuk ka ndodhë, e Gjilani do të vazhdojë me këtë katrahurë deri në zgjedhjet lokale, si momenti i largimit të tij nga qeverisja komunale”, ka thënë Riad Rashiti, kryetar i PDK-së së Gjilanit.  /2LONLINE/