Riad Rashiti: Adresa e lagjes Dardania është Gjilani, jo Novobërda

Riad Rashiti, kryetar i PDK-së së Gjilanit, që njëherësh do të jetë edhe kandidat i këtij subjekti për kryetar komune në zgjedhjet e 12 tetorit  ka thënë se adresa e lagjes Dardania është Gjilani, jo Novobërda.

“Sot pata kënaqësinë të takohem me qytetarët e Lagjes Dardania, ku bashkë ndamë shqetësime, ide dhe shpresa për një të ardhme më të mirë. Në këtë bashkëbisedim, së bashku me ekipin tim, prezantuam programin tonë katërvjeçar dhe u zotuam se çdo kërkesë e paraqitur do të trajtohet me prioritet dhe do të realizohet me kohë”, ka thënë Rashiti i PDK-së.

Ai tha se sa i përket kërkesës së kësaj qeverisjeje që banorët e Dardanisë të regjistrohen si banorë të Novobërdës, “e bëmë të qartë vendosmërinë tonë se kjo nuk do të pranohet dhe nuk do të lejohet kurrë”.

“Para banorëve të Dardanisë u zotuam gjithashtu se: adresat e tyre do të mbeten në Gjilan, do të ketë infrastrukturë të rregulluar e funksionale, pastërti dhe ambient të mirëmbajtur, siguri publike për çdo familje dhe përfundim të projekteve të nisura e të lëna përgjysmë”, thotë Riad Rashiti, kreu i PDK-së së Gjilanit dhe kandidat i këtij subjekti për kryetar komune në zgjedhjet e tetorit /2LONLINE/