Rexhepi: Transformimi më i madh urban në historinë e Gjilanit po vazhdon me një dinamikë të jashtëzakonshme në terren

Drejtori i Drejtorisë për Urbanizëm, Planifikim dhe Mbrojtje të Mjedisit, në Komunën e Gjilanit, Flakron Rexhepi tha se pas përfundimit me sukses të të gjitha ndërhyrjeve të para infrastrukturore dhe përgatitjes së plotë të brezit qendror, projekti i përbashkët i Bulevardit dhe Administratës së re Komunale po kalon zyrtarisht në fazën e tij më intensive të ndërtimit.

Sipas tij, Drejtoria e Urbanizmit ka përmbyllur me saktësi të gjitha koordinimet e nevojshme administrative dhe teknike, duke siguruar që ky projekt integral të zhvillohet sipas planeve tona dinamike të parashikuara që nga dita e parë.

Drejtori Rexhepi ka thënë tutje se ky investim prej rreth 18 milionë euro është dëshmi e zotimit për një Gjilan modern, me hapësira të gjelbra, parkingje nëntokësore dhe infrastrukturë të nivelit evropian.

“Falënderojmë ekipin profesional të Drejtorisë së Urbanizmit për menaxhimin e shkëlqyer të këtij procesi kompleks.  Përkundër tentativave të vazhdueshme politike për të krijuar zhurmë artificiale, përgjigja jonë mbetet e njëjtë: punë e pandalshme, standarde të larta dhe vendosmëri për të realizuar projektin që qytetarët e Gjilanit e kanë pritur me dekada.  Vazhdojmë me krenari dhe përgjegjësi drejt finales së këtij suksesi të madh”, ka thënë drejtori i Urbanizmit, Flakron Rexhepi.  /2LONLINE/