Republika në duart e arrogancës, trishtim heshtja e komandantëve

Shkruan: Avdyl Jerliu

Është tronditëse të shohësh se si Kuvendi i Republikës së Kosovës, institucioni më i lartë dhe më i rëndësishëm i shtetit, është shndërruar në arenën e abuzimit me pushtetin.

Aty ku dikur pritej të artikulohej zëri i popullit dhe të ndërtohej demokracia, sot shohim një përpjekje të vazhdueshme për ta bllokuar funksionimin e shtetit dhe për të shkatërruar çdo mekanizëm kontrolli e balancimi që e mban Republikën gjallë.

E gjithë kjo ndodh në një ironi të dhimbshme historike, përballë syve të komandantëve të luftës, njerëz që dikur u rreshtuan në front për ta sjellë këtë liri.

Sot dhe ditë më parë, shumë prej tyre ishin të pranishëm në sallën e Kuvendit, por jo si zëra të lirisë, por si figura të heshtura, që përjetojnë në heshtje përdhunimin politik të asaj për të cilën, thuhet, se kanë luftuar.

Heshtja e tyre është po aq e dëmshme sa veprimet e atyre që po e degradojnë shtetin. Kur komandantët heshtin, ndërsa Republika përmbyset, atëherë s’mund të mos pyesim: A ishte kjo liria për të cilën u derdh gjaku? Apo ishte thjesht një luftë për karrige?

Sot, Kosova ka nevojë për zëra të fortë, të ndershëm dhe të guximshëm që e mbrojnë Republikën e jo për shurdhëri selektive dhe kompromise të turpshme për pushtet. Sepse heshtja e gardianëve të djeshëm është tradhti ndaj sakrificës së vërtetë. /2LONLINE/