Rektori i Universitetit Publik “Kadri Zeka” priti ne takim Drejtorin Rajonal të Policisë në Gjilan

Rektori i Universitetit Publik “Kadri Zeka”, Prof. Asoc. Dr. Artan Dërmaku, ka pritur sot në një takim Kolonel Agron Rukiqin, Drejtor i Drejtorisë Rajonale të Policisë në Gjilan. Gjatë takimit u diskutua, me fokus të veçantë në sigurinë e komunitetit universitar, parandalimin e dukurive negative dhe krijimin e një mjedisi sa më të sigurt për studentët dhe stafin.

Një temë tjetër e rëndësishme e diskutimit ishte edhe roli i institucioneve të jashtme të interesit në proceset e sigurimit të cilësisë dhe akreditimit të programeve studimore dhe të vetë institucionit. Në këtë kontekst, Drejtoria Rajonale e Policisë në Gjilan, përmes Kolonel Agron Rukiqit, u vlerësua si një partner relevant i jashtëm, i cili mund të kontribuojë në mënyrë indirekte në proceset e vlerësimit institucional, përmes sigurimit të një ambienti të rregullt, të sigurt dhe funksional për zhvillimin e aktivitetit akademik.

Rektori Dërmaku theksoi se Universiteti Publik “Kadri Zeka” është i përkushtuar ndaj standardeve të cilësisë dhe proceseve të akreditimit, ku bashkëpunimi me institucione publike dhe faktorë relevantë të shoqërisë luan rol të rëndësishëm në demonstrimin e funksionalitetit dhe përgjegjësisë institucionale. Ai vlerësoi lartë gatishmërinë e Policisë së Kosovës për bashkëpunim të vazhdueshëm në këtë drejtim.

Nga ana e tij, Kolonel Agron Rukiqi shprehu mbështetjen e Drejtorisë Rajonale të Policisë në Gjilan për të qenë partner aktiv në ruajtjen e sigurisë dhe në mbështetjen e aktiviteteve që kontribuojnë në zhvillimin e një mjedisi akademik të sigurt dhe të rregullt. Ai theksoi se bashkëpunimi me institucionet e arsimit të lartë është i rëndësishëm edhe nga perspektiva më e gjerë shoqërore dhe institucionale.

Në takim u diskutua gjithashtu mundësia e organizimit të aktiviteteve të përbashkëta edukative, ligjëratave dhe sesioneve informuese për studentët, me qëllim rritjen e ndërgjegjësimit për sigurinë, rendin publik dhe rolin e institucioneve në shoqëri. /2LONLINE/