Rektori i UKZ-së priti në takim Komandantin e Regjimentit të Parë të Këmbësorisë së FSK-së me ekipin e tij
Rektori i Universitetit Publik “Kadri Zeka” në Gjilan, Prof. Asoc. Dr. Artan Dermaku, ka pritur në takim zyrtar Komandantin e Regjimentit të Parë të Këmbësorisë të Forcës së Sigurisë së Kosovës në Gjilan, Nënkolonel Arben Avdyli, i shoqëruar nga ekipi i tij.
Ky takim u zhvillua në frymën e bashkëpunimit dhe respektit të ndërsjellë ndërinstitucional, me fokus të veçantë në forcimin e marrëdhënieve mes institucionit të arsimit të lartë dhe institucioneve të sigurisë së vendit. Gjatë diskutimeve, u theksua rëndësia e rolit që FSK-ja ka në shoqërinë kosovare, jo vetëm në aspektin e sigurisë dhe mbrojtjes, por edhe në ndërtimin e stabilitetit, paqes dhe zhvillimit të përgjithshëm shoqëror.
Në takim u shqyrtuan gjithashtu mundësitë konkrete për bashkëpunim në fusha me interes të përbashkët, veçanërisht në aspektin e edukimit, zhvillimit profesional, aktiviteteve akademike, trajnimeve, ligjëratave tematike, si dhe përfshirjes së studentëve në iniciativa dhe aktivitete me karakter qytetar dhe edukativ.
Rektori Prof. Asoc. Dr. Artan Dermaku theksoi përkushtimin e Universitetit Publik “Kadri Zeka” për ndërtimin dhe ruajtjen e bashkëpunimeve të qëndrueshme me institucionet e sigurisë së Republikës së Kosovës. Ai vlerësoi lart kontributin e Forcës së Sigurisë së Kosovës në ruajtjen e paqes, sigurisë dhe stabilitetit, duke e cilësuar atë si një partner të rëndësishëm në promovimin e vlerave qytetare dhe edukative.
Nga ana e tij, Nënkolonel Arben Avdyli falënderoi Rektorin dhe drejtuesit e Universitetit Publik “Kadri Zeka” për pritjen dhe bashkëpunimin e deritanishëm, duke vlerësuar rolin e rëndësishëm të universitetit në formimin e brezave të rinj, ngritjen e kapaciteteve profesionale dhe në zhvillimin e shoqërisë kosovare në tërësi.
Të dy palët shprehën falënderim të ndërsjellë për bashkëpunimin e realizuar gjatë këtij viti, duke e vlerësuar atë si të suksesshëm dhe me ndikim pozitiv si për institucionet përkatëse ashtu edhe për studentët dhe komunitetin në përgjithësi. Po ashtu, u konfirmua gatishmëria për vazhdimin dhe thellimin e bashkëpunimit në të ardhmen, përmes projekteve dhe aktiviteteve të përbashkëta. /2LONLINE/