Refik Shala zgjidhet kryesues i ri i Komitetit të Gjeodezisë

/2L ONLINE/ – Komiteti për Gjeodezi, Kadastër dhe Pronë (KGJKP), të mërkurën, në takimin e radhës, ka zgjedhur Refik Shalën (LDK) për kryesues të ri, meqë kryesuesi i deritashëm Nevzad Rushiti ka kaluar në Komitetin për Politikë dhe Financa (KPF). Njëherësh, Sami Ahmeti është zgjedhur anëtar i ri i KGJKP, në vend të Arben Maliqit, i cili po ashtu ka kaluar në KPF.

Për zgjedhjen e Shalës kanë votuar 6 anëtarë të Komitetit, ndërkaq një (përfaqësuesi i VV) ka abstenuar.

Venhar Haziri, zëvendëskryesues i Komitetit, ka kërkuar nga anëtarët e kësaj trupe komunale vazhdimin e bashkëpunimit të mirë që kanë pasur deri tani, edhe me kryesuesin e ri, meqë Refik Shala, është anëtari më i ri i Kuvendit Komunal, i bindur se bashkërisht do të bëjnë punë të dobishme për qytetarët e Gjilanit.

Komiteti ka falënderuar anëtarët e deritashëm, Nevzad Rushiti e Arben Maliqi, për bashkëpunimin që kanë treguar gjatë kohës sa kanë qenë pjesë e kësaj trupe komunale, e cila ka bërë rekomandime të rëndësishme dhe asnjëra prej tyre nuk është anuluar ose kthyer mbrapsht.

KGJKP, me propozimin e Fadil Hajdarit (PDK) e shtyu për takimin e radhës diskutimin për planin e punës, për t`i dhënë kohë kryesuesit të ri që të përgatis një draft-plan të vetin.

Duke u falënderuar për besimin, Refik Shala njëkohësisht kërkoi bashkëpunim nga anëtarët e KGJKP si dhe nga Drejtoria e linjës.

Sadudin Berisha, drejtor i Gjeodezisë, Kadastrës dhe Pronës, tha se ky Komitet ka qenë deri tani ndër trupat më funksionalë të Kuvendit Komunal dhe u shpreh i bindur se me këtë ritëm do të vazhdojë edhe në të ardhmen, ndërkohë që premtoi bashkëpunimin e tij. /2L ONLINE/