Realizohet trajnimi për hetimin e krimit kibernetik për reaguesit e parë

Policia e Kosovës, në bashkëpunim të ngushtë me Zyrën e UNDP-së në Republikën e Kosovës, respektivisht Programin për Siguri (KSSP), ka organizuar një trajnim dyditor me fokus në fuqizimin e kapaciteteve të zyrtarëve të saj në fushën e hetimit të krimeve kibernetike.

Ky aktivitet shënon një hap të rëndësishëm në avancimin e aftësive të hetuesve dhe oficerëve të parë përgjegjës, duke siguruar që ata të jenë më të përgatitur në mbledhjen dhe ruajtjen e provave elektronike, si dhe në zhvillimin e hetimeve të suksesshme.

Falë mbështetjes së vazhdueshme dhe shumë të vlefshme të UNDP-së, Policia e Kosovës vazhdon të ndërtojë kapacitete profesionale moderne dhe të qëndrueshme, duke forcuar kështu sigurinë publike dhe besimin qytetar. /2LONLINE/