Reagon Ismajli: Komuna e Gjilanit po e dërgon shëndetësinë primare drejt krizës më të thellë të mundshme

“Komuna e Gjilanit po e dërgon shëndetësinë primare drejt krizës më të thellë të mundshme. Nga 1 dhjetori, 45 mantelbardhë, mjekë e teknik, që deri tani kanë mbajtur shërbimet shëndetësore në këmbë, po dërgohen në shtëpi sepse Komuna nuk po ua vazhdon kontratat. Vendim skandaloz dhe dëshmi e keqmenaxhimit të thellë”, thotë Arbër Ismajli, nënkryetar i LDK-së së Gjilanit.

Ai shtoi se pikërisht, këtu del në pah hipokrizia se dikur ky pushteti u thoshte këtyre profesionistëve se “nëse ndërrohet pushteti, do të mbeteni pa punë”, e sot po e tregojnë fytyrën e vërtetë, që për vota nuk kanë limite në përdorim dhe se manipulimi me frikë e shantazh ka qenë vetëm politikë e ulët, sepse sot, pa u ndërruar as pushteti, po i largojnë nga puna vetë njerëzit që e kanë mbajtur sistemin gjallë.

Përveç tjerash, Ismaji thotë se këta profesionistë nuk janë paguar me rregull për muaj të tërë, e tani po përjashtohen edhe nga ushtrimi i profesionit, duke lënë qytetarët pa shërbime dhe familjet e tyre pa të ardhura. Ndërkohë, paratë publike po shpenzohen pa plan, si dhurata të babadimrit, ndërsa sektorët kryesorë po rrëzohen.

Sipas tij, e njëjta situatë po ndodh edhe me punëtorët e Tregut, të cilët nuk janë paguar me muaj, janë me borxhe e kredi mbi supe dhe janë lënë krejt nën mëshirën e fatit. Kjo është fyese dhe e papranueshme për një institucion që duhet t’i mbrojë punëtorët, e jo t’i braktisë.

“Ju bëjmë thirrje Komunës së Gjilanit të marrë përgjegjësi, të vazhdojë menjëherë kontratat e mantelbardhëve dhe të sigurojë pagat për mbi 300 punëtorët e Tregut. Komuna duhet të gjejë rrugën ligjore që këta profesionistë të vazhdojnë punën dhe qytetarët të mos mbesin pa shërbime. Mirëqenia e qytetarëve nuk mund të lihet në dorë të vendimeve arbitrare”, thotë Arbër ismajli, nënkryetar i LDK-së së Gjilanit.  /2LONLINE/