Reagon Arbër Ismajli: Edhe mantelbardhët viktima të një qeverisjeje të papërgjegjshme!

Nënkryetari i Lidhjes Demokratike të Kosovës (LDK), në Gjilan, Arbër Ismajli ka thënë se janë bërë gati tre muaj prej se punëtorët shëndetësorë të angazhuar me tenderin “Kosovamed” nuk kanë marrë pagat e tyre nga ana e komunës, ndonëse kanë kryer punën me shumë ndershmëri e përkushtim.

“Pra, edhe mantelbardhët të cilët kujdesen për shëndetin e qytetarëve tanë, sot janë viktima të një qeverisjeje të papërgjegjshme që i ka lënë pa bukë, pa dinjitet dhe pa asnjë shpresë”, ka thënë ai, transmeton 2LONLINE.com.

Ismajli shtoi se pagat e tyre janë e drejtë elementare dhe vonimi i saj sjell pasoja të rënda për mirëqenien e familjeve të tyre.

“Mjaftë më me këto lojëra politike. Qytetarët dhe profesionistët nuk e meritojnë një trajtim të tillë. Ata që mbajnë mbi supe shëndetin e qytetarëve nuk guxojnë të keqtrajtohen deri në këtë pikë”, ka thënë Ismajli i LDK-së.

Përndryshe, në zgjedhjet e 12 tetorit, Arbër Ismajli synon postin e të parit të komunës duke qenë kandidat i LDK-së për kryetar komune.  /2LONLINE/