Reagojnë edhe LDK dhe disa partnerë të saj të vegjël
/2L ONLINE/ – Shpimi i gomave të disa veturave zyrtare të komunës së Gjilanit ka nxitur reagime edhe tek LDK dhe disa subjekte të vogla, që janë partnerë të LDK-së në bashkëqeverisje. Madje këta e drejtojnë gishtin kah Vetëvendosje si kryese e këtij akti, ndërkohë që vet kjo Lëvizje ka reaguar duke thënë se nuk qëndron prapa këtij aksioni.
Shih më tepër shkrimin;
“Aksioni nuk është realizuar nga Lëvizja Vetëvendosje”
Më herët kishte reaguar edhe kreu i komunës Lutfi Haziri si dhe kryesuesja e kuvendit Valentina Bunjaku-Rexhepi.
Shih shkrimet:
“‘Decentralizimi i Lutës’e ka sjellë Pavarësinë, ‘Zajednica’ e VV-së po e rrënon”
Bunjaku-Rexhepi: Turp për Vetëvendosjen!
Përndryshe, ka reaguar edhe Lidhja Demokratike e Kosovës (LDK), Dega në Gjilan, që përmes një komunikate shprehë indinjatën dhe dënon fuqishëm manifestimin e dhunës dhe huliganizmin e treguar, sipas saj, nga ana e aktivistëve të “Vetëvendosjes” ndaj pronës publike, konkretisht dëmtimit të veturave të Komunës së Gjilanit.
“Sulmi dhe dëmtimi i pronës publike, i cili është kryer sot nga aktivist të “Vetëvendosjes” , është një akt politikisht i papërgjegjshëm dhe në kundërshtim me rendin dhe ligjet e vendit tonë. Ky akt është vandal dhe manifestim huliganizmi për qëllime të përfitimeve politike. Aktet e tilla me qëllime të ulëta, janë mesazh se këta njerëz deri sa kërkojnë votën e qytetarëve keqpërdorin dhe dëmtojnë pasurinë e këtij shteti e që është pasuri e ngritur me mundin dhe djersën e qytetarëve tanë. Ata që kryejnë akte të dhunës dhe shkatërrojnë prona jo vetëm që kryejnë shkelje, por gjithashtu abuzojnë me kauzën tonë dhe me demokracinë e Kosovës”, thuhet në reagimin e LDK-së së Gjilanit.
Më tutje në reagim ky subjekt potencon se “LDK, i jep mbështetje të fuqishme Kryetarit Lutfi Haziri dhe qeverisjes komunale në realizimin e programit qeverisës, program ky që po forcon institucionet komunale dhe mirëqenien e qytetarëve. LDK, kërkon nga institucionet e sigurisë dhe drejtësisë të Republikës së Kosovës që të trajtoj me seriozitet të gjitha aktet e dhunës dhe huliganizmit dhe të stopoj veprimet e tilla të ulëta e që janë në kundërshtim me rendin kushtetues të vendit tonë.
“Ndërsa qytetarët tanë i sigurojmë se sundimi i rendit dhe ligjit në vendin tonë nuk ka dhe nuk do të ketë alternativë”, përfund reagimi i Degës së LDK-së në Gjilan.
Edhe subjektet partnere të koalicionit thanë se e dënojnë veprimin e shkatërrimit të pronës publike.
Në reagimin e tyre thuhet:
“Ajo që ndodhi sot në orët e pasditës nga ana e aktivistëve të ndonjë partie duke I shpërthyer gomat e veturave të Komunës është gjest i papranueshëm edhe nga ana e partive të koalicionit (AKR, Partia DemorkatikeTurke, PD} në qeverisjen Haziri.
Mendojmë se veprimet e tilla vandalistë ku shkatërrohet prona publike si pronë e qytetarëve është e papranueshme, si shprehje e pakënaqësive partiake. Komuna nuk është e Lutif Hazirit apo pronë e cilësdo parti politike, ajo I takon qytetarit dhe kryen funksionin e servisit të tyre. Për këtë arsye askush nuk e ka të drejtën ti shpreh inatet e tyre me shkatërrimin e pronës komunale apo më mirë të themi pronës së qytetarit. Me shpresë se veprimet e aktivistëve partiak nuk janë edhe qëndrimet partiake. Shpresojmë në mirëkuptim dhe kërkimfalje ndaj qytetarëve të Gjilanit”, perfundon reagimi i partive të koalicionit në qeverisjen Haziri (AKR, Partia DemorkatikeTurke, PD). /2L ONLINE/
/fotoilustirm/