Rasti i Shefqet Krasniqit kthehet në rivendosje

Gjykata e Apelit në Prishtinë, për shkaqe të natyrës procedurale, ka kthyer në rivendosje çështjen e caktimit të masës se paraburgimit prej një muaji, ndaj të pandehurit Shefqet Krasniqi.

Gjykata e Apelit e ka vlerësuar si të pa bazuar vendimin e shkallës së parë, për caktimin e masës së paraburgimit prej një muaji, imamit të Xhamisë së Madhe në Prishtinë, Shefqet Krasniqi.

“Gjykata e Apelit vlerëson se aktvendimi i shkallës së parë PPR. KR. 453/2014, i datës 02.10.2014, është marr pa u mbajtur seancë dëgjimore, duke mos iu dhënë rasti prokurorit t’i paraqes provat, argumentet e veta si dhe të pandehurit dhe mbrojtësve të tij, t’i kundërshtojnë ato. Si i tillë, aktvendimi është i pa bazuar”, thuhet në njoftimin e Gjykatës së Apelit.

Deri në marrjen e një vendimi të ri nga ana e Gjykatës Themelore në Prishtinë, i pandehuri Shefqet Krasniqi do të mbetet në paraburgim.