Rashiti: Vendimi për deponinë e mbeturinave inerte në Malishevë nuk duhet të miratohet nga Kuvendi i Gjilanit

Kryetari i Partisë Demokratike të Kosovës (PDK), Dega në Gjilan, Riad Rashiti ka thënë në një reagim të tij se kryetari i Komunës së Gjilanit ka propozuar që Kuvendi Komunal të marrë vendim për krijimin e një deponie të mbeturinave inerte në fshatin Malishevë, në vendin e quajtur “Prrunishtë”, pa asnjë njoftim dhe pa asnjë konsultim publik me banorët e fshatit.

Sipas tij, vendimi për deponinë e mbeturinave inerte në fshatin Malishevë nuk duhet të miratohet nga Kuvendi Komunal i Gjilanit

Ky lokacion, sipas Rashitit. është jetik për banorët e Malishevës, sepse në atë zonë furnizohet me ujë i gjithë fshati përmes dhjetëra puseve familjare, si dhe rrjeti i ujësjellësit që shërben për mbi 800 shtëpi të fshatit.

I pari i PDK-së së Gjilanitm që është parti oopozitare, ka thënë se ky propozim-vendim është skandaloz, i papranueshëm dhe i rrezikshëm për shëndetin dhe jetën e banorëve të Malishevës, por edhe e shkatërron ambientin në pjesën më të bukur të fshatit. Si i tillë, ai do të kundërshtohet me të gjitha format demokratike dhe organizative.

“Në seancën e Kuvendit Komunal, (e paraparë të mbahet sot), ne si PDK do ta kundërshtojmë fuqishëm miratimin e këtij vendimi dhe do të kërkojmë përkrahjen e të gjithë anëtarëve të Kuvendit Komunal dhe të gjitha subjekteve politike, që të mos lejojnë miratimin e një vendimi të padrejtë dhe të dëmshëm për banorët e Malishevës”, ka thënë Riad Rashiti, kryetar i PDK-së së Gjilanit.  /2LONLINE/