Rashiti: E turpshme, Komuna e Gjilanit po injoron figurat e lavdishme të UÇK-së, harrohet përvjetori i heroit Abdullah Tahiri

Kreu i Partisë Demokratike të Kosovës (PDK), Dega në Gjilan, Riad Rashiti, në një deklaratë për publikun ka shprehur reagimin e tij, duke thënë se është e papranueshme dhe e pakuptimtë që për shkak të inateve politike, Komuna e Gjilanit dhe konkretisht Drejtoria për Kulturë, Rini dhe Sport, po bëjnë selektime në përkujdesjen institucionale ndaj dëshmorëve të luftës çlirimtare.

Ai tha se nesër shënohet përvjetori i rënies së heroit tonë kombëtar, Abdullah Tahiri – një prej figurave më të rëndësishme të luftës për liri dhe në organizimin e Ushtrisë Çlirimtare të Kosovës në Anamoravë dhe është obligim moral, qytetar e institucional që çdo përvjetor i tillë të përkujtohet denjësisht nga institucionet lokale dhe ato qendrore.

Fatkeqësisht, thotë tutje Rashiti, Komuna e Gjilanit ka dështuar të realizojë agjendën vjetore të aktiviteteve për nder të heronjve tanë, duke injoruar kështu edhe këtë përvjetor të rëndësishëm.

“Në mungesë të këtij organizimi, Partia Demokratike e Kosovës – Dega në Gjilan do të marrë përsipër nderimin e figurës së Abdullah Tahirit. Ftojmë qytetarët, bashkëluftëtarët dhe të gjithë ata që e çmojnë sakrificën për liri, që nesër, me datë 19 Maj në ora 11:00, të bashkohen me ne në homazhe që do të fillojnë tek Varrezat e Dëshmorëve, do të vazhdojnë tek shtatorja e Abdullah Tahirit në Gjilan, e më pas në aktivitetin përkujtimor në shkollën e fshatit Malishevë”, thotë i pari i PDK-së së Gjilanit, Riad Rashiti.  /2LONLINE/