Ranillugu zëvendësoi “Slobodan Milosheviqin” me “Nënë Jevrosimën”

Kuvendi Komunal i Ranillugut ka marrë vendim që të heqë emërtimin e rrugës “Slobodan Milosheviq” dhe ta zëvendësojë me “Nënë Jevrosima”.

Emri i ish-liderit serb i akuzuar nga Gjykata Ndërkombëtare e Hagës për krime lufte ndaj popullatës shqiptare në periudhën 1998-1999 është zëvendësuar me “Nënën Jevrosima”, një figurë religjionit ortodoks.

Këto ndryshime kanë ardhur pas reagimit të institucione vendore dhe ndërkombëtare të cilat kishin vlerësuar se vendosja e një tabele me emrin e diktatorit serb ishte i papranueshëm.

Për emrin e ri të rrugës është prononcuar shkurt Sasha Aleksiq, kryesues i Kuvendit Komunal të Ranillugut. Ai ka thënë se në mbledhjen e Kuvendit Komunal kanë bërë ndryshimet e nevojshme që janë kërkuar nga institucionet e nivelit qendror, shkruan Koha Ditore.