Njohësi i proceseve politike në vend dhe të sigurisë, Burim Ramadani, ka thënë se situata e tashme politike është kthyer në një burim të pashtershëm të rreziqeve të sigurisë dhe qëndrueshmërisë së shtetit. Në këtë intervistë për “Epokën e re” Ramadani ka bërë me dije se kriza politike do të mund të tejkalohej shpejt, pasi Qeveria të marrë përgjegjësinë shtetërore për situatën e krijuar nga qasja e saj dhe opozita të largohet nga metodat e deritashme.
Ramadani ka thënë se siguria në vend kurrë nuk ka qenë më e keqe. Duke komentuar veprimet e fundit, djegien e veturave dhe hedhjen me koktej molotovi në objektet e institucioneve, Ramadani ka thënë se këto veprime po e fusin Kosovën në një shkallë më të rrezikshme dhe më të rëndë.
“Fatkeqësia e Kosovës, për shkak të moszhvillimit të demokracisë së saj, nuk duhet dhe nuk guxon të shumëzohet tashmë me incidente të sigurisë. Tekefundit, nëse kriza është politike, vetëm si e tillë mund të zgjidhet. Nuk zgjidhet kriza politike nëpërmjet përkeqësimit të sigurisë. Përkundrazi, vetëm e thellon të keqen dhe e rëndon të ardhmen”, ka thënë Ramadani.
Në këtë intervistë Ramadani ka folur edhe për largimin e tij nga aktivitetet politike partiake dhe angazhimin e tij në sektorin e sigurisë kombëtare. “Do të vazhdoj në këshillëdhënie për temat e sigurisë, angazhimin në ligjërim për sigurinë kombëtare dhe, njëkohësisht, me disa profesionistë të tjerë kemi themeluar një Qendër Kërkimore për Politika të Sigurisë (SPRC). Po planifikoj, po ashtu, fillimin e studimeve të doktoratës gjatë këtij viti. Jeta politike është rënduar tejmase dhe të angazhuarit direkt është më e komplikuar se më parë”, ka deklaruar Ramadani.
për më tepër:
http://epokaere.com/index.aspx?SID=13&PMID=2&LID=2&ACatID=1&AID=82747&Ctype=1