QNTKSH mbështet institucionet vendore në ngritjen e kapaciteteve për reagim emergjent
Në Qendrën Ndërkombëtare Trajnuese për Kërkim-Shpëtim (QNTKSH) të Forcës së Sigurisë së Kosovës janë realizuar trajnimi Kërkim-Shpëtim Urban – Niveli Bazik dhe trajnimi për Repelim.
Në këto trajnime ishin pjesëmarrës nga Agjencia për Menaxhimin e Emergjencave, Policia e Kosovës, ekipi mjekësor nga Prizreni dhe Policia Ushtarake.
Gjatë trajnimeve, pjesëmarrësit zhvilluan njohuri dhe aftësi praktike në fushën e kërkim-shpëtimit urban dhe Repelimit duke përfshirë sigurinë gjatë operacioneve, punën ekipore, përdorimin e pajisjeve, qasjen deri te viktimat dhe veprimet bazike për reagim në raste të fatkeqësive natyrore dhe emergjencave të tjera, teknikat e zbritjes me litar, masat e sigurisë në terren.
Këto trajnime janë pjesë e përpjekjeve për ngritjen dhe zhvillimin e kapaciteteve kombëtare në fushën e kërkim-shpëtimit urban, në koordinim me programin IPA CARE dhe me orientim drejt praktikave dhe standardeve ndërkombëtare, përfshirë udhëzimet e INSARAG-ut në kuadër të Kombeve të Bashkuara.
Me këtë synohet forcimi i kapaciteteve profesionale të reaguesve të parë dhe përgatitja e tyre për intervenime më efikase brenda dhe jashtë vendit, si dhe për proceset e mëtejshme të zhvillimit dhe certifikimit në mekanizmat ndërkombëtarë, përfshirë Mekanizmin Evropian të Mbrojtjes Civile dhe INSARAG.
Realizimi i trajnimeve në këtë fushë dëshmon përkushtimin e Forcës së Sigurisë së Kosovës, përmes QNTKSH-së, për të mbështetur institucionet vendore në ngritjen e kapaciteteve të specializuara për reagim të shpejtë, të sigurt dhe profesional në situata emergjente. /2LONLINE/