QKSS-ja inkurajon miratimin e projektligjeve për tranzicionin e FSK-së në ushtri

QKSS-ja inkurajon miratimin e projektligjeve për tranzicionin e FSK-së në ushtri

Qendra Kosovare për Studime të Sigurisë (QKSS) ka inkurajuar Kuvendin e Kosovës që të procedojë me miratimin e pakos së projektligjeve për FSK-në në leximin e dytë, dhe rrjedhimisht t’i hap rrugë tranzicionit të FSK-së në një mandat mbrojtës.

QKSS-ja konsideron se ky është një proces i logjikshëm shtetndërtues për të cilin është punuar intensivisht gjatë pesë viteve të fundit.

Sipas kësaj qendre, është tejet e rëndësishme që ky proces të mos instrumentalizohet për përfitime personale e politike mirëpo të transmetohet si një arritur nacionale me benefite për Kosovën, rajonin dhe më gjerë.

QKSS-ja fton institucionet që me gjakftohtësi t’i rezistojnë presioneve nga ana e disa shteteve të cilat këtë tranzicion e shohin me skepticizëm.

“Rikujtojmë se QKSS që nga viti 2015 ka paralajmëruar që forma e tranzicionit të FSK-së përmes ndryshimeve të ligjeve është formë komplet e ligjshme dhe legjitime. Qëndrimet e NATO-s nuk mund të reflektojnë qëndrimin e aleancës e cila e ka vendimmarrjen në bazë të konsensusit e ku një shumicë e shteteve anëtare të NATO-s e përkrah këtë proces si një të drejtë të Kosovës dhe, para së gjithash, një benefit për NATO-n e cila do ta konsideron storjen e saj të suksesit në Kosovë vetëm atëherë kur len si pasardhëse një forcë mbrojtëse dhe të aftë për të ofruar siguri për të gjithë qytetarët”, është thënë në komunikatën e QKSS-së.

QKSS-ja është shprehur e dëshpëruar nga qëndrimi rigjid i Spanjës dhe mbase edhe ca shteteve tjera të cilat vazhdojnë të punojnë aktivisht në dëm të anëtarësimit të Kosovës në organizata ndërkombëtare.

“E njëjta vlen edhe për NATO-n ku perspektiva e tanishme e Kosovës është pothuajse inekzistente përderisa katër shtete anëtare ende nuk e kanë njohur Kosovën. Konsiderojmë se shumë shtete jo vetëm se në vazhdimësi ekzagjerojnë nevojën për një stabilitet nominal mirëpo edhe së voni po i bijën pre e një makinerie të lajmeve të rrejshme e cila ka për qëllim krijimin e frikës dhe pasigurisë, sidomos në veri të vendit”, është theksuar më tutje në komunikatë.

QKSS-ja ka vlerësuar se tranzicioni i FSK-së në ushtri nuk do të ketë impakt të menjëhershëm përderisa është një proces që do t’i merr 7-10 vite.

“Ndërtimi i kapaciteteve të saj sigurisht se pritet të bëhet bazuar në mbështetjen bilaterale të shteteve përderisa NATO, ashtu sikurse në rastin e mandatit aktual, ka një hapësirë shumë të ngushtë veprimi për shkak të mungesës së konsensusit. Mandati i kufizuar për qëllime të vetëmbrojtjes është në shërbim të ruajtjes së paqes, jo luftës”, është theksuar në komunikatën e QKSS-së.

BURIMI: Epoka e re

KOMENTE