Qeveria dështoi dhe mashtroi për 100 ditë

Sot (e enjte) bëhen 100 ditë prej kur është votuar në Kuvend qeveria e drejtuar nga Isa Mustafa, i cili zyrtarisht detyrën e kryeministrit e ka marrë më 12 dhjetor të vitit të kaluar.

Me rastin e shënimit të 100-ditëshit të parë të qeverisë, partitë opozitare kanë drejtuar kritika ndaj qeverisë Mustafa, duke e quajtur qeveri të dështimit.
Deputetja e Lëvizjes Vetëvendosje!, Aida Dërguti, ka thënë se kjo lëvizje nuk ka pasur pritje për 100-ditëshin apo për tërë mandatin qeverisës.

Ajo ka thënë për “Epokën e re” se mënyra e qeverisjes është parë që prej fillimit ku marrëveshja PDK – LDK s’ka pasur asnjë çështje të rëndësishme për interesin e qytetarëve, por e gjitha ka qenë e bazuar në ndarjen e posteve mes këtyre dy subjekteve.

“Ajo që pamë gjatë këtij 100-ditëshi është qeverisje shumë e dobët, me një përfaqësim jashtëzakonisht të dobët të ministrave. Në fillim ishte çështja Jabllanoviq, ku qeveria tregoi plogështi, duke mos marrë guximin ta shkarkojë një ministër i cili i ofendoi rëndë qytetarët e Kosovës. Pastaj dëgjuam deklarimin e ministrit të Zhvillimit Ekonomik, Blerand Stavileci, i cili i ofendoi njerëzit e varfër të Kosovës. Po ashtu kemi parë një dyndje masive. Mënyra se si u deklaruan ministri i Punëve të Brendshme dhe ai i Punëve të Jashtme nuk ishte e duhur për menaxhimin e situatës”, ka thënë Dërguti, duke shtuar se programi i qeverisë Mustafa është qesharak.

Ndërsa lideri i Aleancës për Ardhmërinë e Kosovës (AAK), Ramush Haradinaj, e ka quajtur qeveri të mashtrimit qeverinë e drejtuar nga Isa Mustafa dhe Hashim Thaçi. “Këto 100 ditë të qeverisë Mustafa – Thaçi janë karakterizuar me mashtrime dhe dështime. Ne kemi identifikuar 100 dështime për këto 100 ditë. Prandaj, fjala që i përshtatet më së shumti këtij 100-ditëshi është mashtrimi. Thjesht, jemi në një vorbull të mashtrimit nga qeveria Mustafa – Thaçi”, ka deklaruar Haradinaj të mërkurën në një konferencë për medie, në të cilën ka folur për 100-ditëshin e parë të qeverisë Mustafa.

Për më tepër:

http://www.epokaere.com/index.aspx?SID=13&PMID=2&LID=2&ACatID=1&AID=60472&Ctype=1