Qëndresa Kallaba nga Dardana fituese e vendit të parë në recitimet e Flakadanit 2016

/2L ONLINE/ – Janë zhvilluar sot garat rajonale të recituesve të shkollave të mesme, në kuadër të manifestimit të “Flakadanit të Karadakut 2016”. Në këtë garë morrin pjesë nxënës nga shkollat e mesme të komunave Preshevë, Gjilan, Ferizaj, Dardana dhe Viti.
Në emër të institucioneve komunale të Vitisë, zv.kryetari i komunës Hasan Aliu ka përshëndetur nxënësit pjesëmarrës të kësaj gare, ndërkohë që ka theksuar se prezenca e tyre jo vetëm që nderon manifestimin por mbi të gjitha veprën e komandant Mjekrës dhe gjithë dëshmorëve të rënë për liri.

Në emër të shkollave pjesëmarrëse, organizatorët por edhe të pranishmit i ka përshëndetur Sabri Morina nga drejtoria për Arsim e Kamenicës. Nga gjithsejtë 24 recitime që u prezantuan në këtë garë, juria profesionale ka përzgjedhur si recitimin më të mirë atë të Qëndresa Kallabës nga Gjimnazi “Ismajl Qemajli” nga Dardana, vendi i dytë Arbnora Salihut nga Gjimnazi “Kuvendi i Arbërit” nga Ferizaj, si dhe vendi i tretë për Fatlinda Basha nga Gjimnazi “Xhavit Ahmeti” nga Gjilani.

Drejtoria për Kulturë Rini e Sport në Viti, për nxënësit pjesëmarrës dhe jurinë profesionale ka ndarë nga një dhuratë modeste, ndërkohë me mirënjohje ka nderuar edhe gjitha shkollat pjesëmarrëse. /2L ONLINE/