Punëtori për hartimin e legjislacionit në kuadër të reformave në drejtësi

Përfaqësues të sistemit gjyqësor, përfshirë anëtarët e Këshillit Gjyqësor të Kosovës, Besnik Bislimaj dhe Ahmet Imami, kryetarin dhe nënkryetarin e Gjykatës Themelore në Prishtinë, Ngadhnjim Arrni dhe Argzon Muçaj, si dhe gjyqtari i Gjykatës Supreme, Albert Zogaj, morën pjesë në një punëtori treditore të organizuar nga Ministria e Drejtësisë.

Punëtoria ka për qëllim hartimin dhe finalizimin e legjislacionit që rrjedh nga Deklarata e Përbashkët e Zotimit, në funksion të avancimit të reformave në drejtësi dhe përafrimit me standardet ndërkombëtare.

Gjatë kësaj punëtorie, draftet ligjore po shqyrtohen me fokus në përmirësimin e efikasitetit, pavarësisë dhe transparencës së sistemit gjyqësor, përmes kontributeve profesionale dhe bashkëpunimit ndërinstitucional.

Përfaqësuesit gjyqësorë kanë rikonfirmuar përkushtimin e tyre për të kontribuar në proceset reformuese, në funksion të forcimit të sundimit të ligjit dhe rritjes së besimit të publikut në drejtësi. /2LONLINE/