Punëtori me temë “Transformimi Digjital dhe Zgjidhjet e Mençura Komunale”

Drejtoria për Mbrojtje dhe Shpëtim (DMSH) e Komunës së Gjilanit, ishte pjesë e punëtorisë me temë “Transformimi Digjital dhe Zgjidhjet e Mençura Komunale”, të organizuar nga Cacttus Education, me qëllim të avancimit të njohurive dhe shkëmbimit të përvojave lidhur me përdorimin e teknologjisë dhe inovacionit në institucionet publike.

Gjatë punëtorisë u prezantuan praktika dhe modele bashkëkohore të transformimit digjital, të cilat synojnë përmirësimin e ofrimit të shërbimeve komunale, rritjen e efikasitetit në punë, transparencën institucionale dhe komunikimin më të shpejtë me qytetarët.

Po ashtu, u diskutua për rolin e zgjidhjeve të mençura komunale në krijimin e një administrate më moderne dhe më të gatshme për t’iu përgjigjur nevojave të qytetarëve.

Përfaqësuesit e Drejtorisë për Mbrojtje dhe Shpëtim kontribuuan në diskutime duke ndarë përvojat dhe sfidat e hasura në fushën e menaxhimit të emergjencave, mbrojtjes civile dhe reagimit ndaj fatkeqësive natyrore.

Drejtori për Mbrojtje dhe Shpëtim në Komunën e Gjilanit, Enver Shabani ka bërë me dije se në fokus të veçantë ishte rëndësia e përdorimit të teknologjive digjitale për monitorimin e rreziqeve, menaxhimin e informacioneve në kohë reale, koordinimin ndërinstitucional dhe përmirësimin e sistemeve të paralajmërimit dhe reagimit emergjent, transmeton 2LONLINE.

Drejtori Shabani tha se pjesëmarrja në këtë punëtori paraqet një mundësi të vlefshme për ngritjen e kapaciteteve profesionale të stafit dhe për identifikimin e praktikave të reja që mund të kontribuojnë në modernizimin e proceseve të punës dhe forcimin e sigurisë së qytetarëve.

“Drejtoria për Mbrojtje dhe Shpëtim mbetet e përkushtuar në ndjekjen e zhvillimeve bashkëkohore dhe në përfshirjen e zgjidhjeve inovative që ndihmojnë në rritjen e gatishmërisë dhe efikasitetit institucional”, ka thënë drejtori i DMSH-së, Enver Shabani.  /2LONLINE/