Pse vazhdon kjo heshtje për “Eco-Higjienën”?! (II)

/2L ONLINE/ – Nëse del të jetë i vërtetë informacioni i dhënë nga kryetari i Komisionit të Aksionarëve të “Eco-Higjiena” se në këtë kompani nga pala private deri tani janë investuar vetëm 257 mijë euro, atëherë partneri privat nuk e ka zbatuar Nenin 5, pika B, ku shprehimisht thuhet se: Çdo përfitim i palëve në fitimet e ndërmarrjes së përbashkët, gjatë 30 muajve gjersa të arrihet përpjesëtimi i kontributeve 49 : 51, do të vlerësohet në mënyrë proporcionale sipas realizimit të investimeve të parapara ne marrëveshje.

Jo pas 30 muajve, por as pas 47 muajve nuk qenka kryer obligimi nga ana e tyre.

Nga kjo lirisht mund të konstatohet se për krejt këtë periudhë kohore, që nga nënshkrimi i marrëveshjes, përfitimi i palës private jashtë proporcionit të investimit është i paligjshëm dhe si i tillë duhet të shqyrtohet tërësisht.

Ky avaz ka vazhduar njëjtë para syve të të gjithëve, pozitë dhe opozitë. Vetëm ata i dinë arsyet e kësaj heshtjeje kaq të gjatë.

Në vend të tyre, si qytetar parashtroj këto pyetje publike për të gjithë.

Pse është bërë zhvleftësimi i asteve pa miratimin e palës publike dhe për më keq, pse janë shitur këto asete pa miratimin e palës publike, kur marrëveshja e thotë të kundërtën?

Pse pjesa e marrëveshjes për inkasimin e borxheve të vjetra (të cilat sipas marrëveshjes i kanë takuar Komunës së Gjilanit) nuk është zbatuar?
Sipas marrëveshjes PPP mjetet e inkasuara nga borxhi i vjetër i qytetareve për kompaninë do të duhej të shërbenin për shlyerjen e obligimeve që kompania kishte gjatë periudhës që ka operuar vetëm.

Pse vendimi i Qeverisë për zbritjen e TVSH-së për tarifat e shërbimeve ndaj qytetarëve nga 16 % në 8% nuk është zbatuar ashtu siç obligohen të gjitha ndërmarrjet publike në Republikën e Kosovës?

Kompanitë simotra publike siç është KRM “Pastrimi” në Prishtinë ka zbrite tarifën për ekonomitë familjare nga 5 euro në 4.70 euro, bazuar në këtë vendim.

Nëse arsyetimi thotë se kemi të bëjmë me Partneritet Privat Publik, kjo nuk është e vërtetë sepse KRM “Higjiena” nuk ka ndryshuar pronar, por vetëm është marrë përkohësisht në menaxhim me 51 % të aksioneve nga një operator privat.

Sipas një përllogaritje të vogël del se që nga hyrja në fuqi e vendimit të Qeverisë për zbritjen e TVSH-së te kompanitë publike , “Eco-Higjiena” ka përfituar paligjshëm nga çdo ekonomi familjare e Komunës së Gjilanit nga 30 cent secilin muaj. Kjo kompani në rajonin tonë ngarkon me fatura mujore rreth 20.000 familje, thënë shkurt e shqip inkason paligjshëm rreth 6.000 € në muaj. /2L ONLINE/

Shih edhe: Pse kjo heshtje për “Eco Higjienën” ?!