“Qeverisje më e mirë për shoqëri më të mirë”, është sllogani i projektit të ri të financuar nga BE “Mbështetje për zbatimin e Strategjisë Qeveritare për Bashkëpunim me Shoqërinë Civile” që sot u lansua nga Zyra e BE-së në Kosovë dhe Zyra për Qeverisje të Mirë në Zyrën e Kryeministrit të Kosovës.
Projekti synon të përmirësojë kapacitetet e Qeverisë së Kosovës për të ndërtuar bashkëpunim efektiv me shoqërinë civile në ndërmarrjen e reformave të rëndësishme ekonomike dhe sociale në vend. Përfitues kryesorë të këtij projekti 24 mujor janë Zyra për Qeverisje të Mirë në Zyrën e Kryeministrit dhe Ministria e Financave. Vlera e përgjithshme e projektit është 342,000. Ai financohet nga instrumenti IPA II, komponenti për Shoqërisë Civile në Kosovë 2014-2015 dhe menaxhohet nga WYG International dhe CESO Development Consultants.
Drejtor i Zyrës për Qeverisje të Mirë, Habit Hajredini, prezantoi katër objektiva strategjike të Strategjisë së Qeverisë së Kosovës për bashkëpunim me shoqërinë civile që do të mbështetet përmes projektit, përkatësisht: standardet minimale të konsultimeve publike me shoqërinë civile; standardet dhe procedurat për ofrimin e shërbimeve publike nga ana e organizatave të shoqërisë civile; zhvillimin e vullnetarizmit dhe sistemin e financimit publik të projekteve të shoqërisë civile.
Christoph Stock, Shef i Bashkëpunimit në Zyrën e BE-së në Kosovë, theksoi rëndësinë e përmirësimit të bashkëpunimit të Qeverisë me shoqërinë civile për suksesin e procesit të Stabilizim Asociimit. Ai gjithashtu vuri në dukje se ky është një prioritet i cili qëndron në udhëkryqet e të gjitha reformave të sektorit dhe ripohoi përkushtimin e BE-së për të mbështetur procesin e zhvillimit të partneriteteve të rëndësishme në mes të shoqërisë civile dhe autoriteteve publike.
Udhëheqës i ekipit të projektit, Igor Vidacak, tha se aktivitetet e projektit në mbështetje të bashkëpunimit Qeveri – shoqëri civile pritet të kenë ndikim pozitiv në të gjitha fushat e politikave relevante në rrugën e integrimit evropian të Kosovës. Qeverisje më e mirë do të thotë të dëgjosh dhe t’i përgjigjesh inputeve të shoqërisë civile, por gjithashtu duke njohur shoqërinë civile si partner në përmirësimin e shërbimeve publike.