Pritet dërgimi i punëtorëve sezonalë në BE

Ministri i Financave, Avdullah Hoti, ka paralajmëruar marrëveshje me vendet e BE-së për punësime sezonale të qytetarëve të Kosovës. Hoti, ka thënë se për këtë punë është duke u angazhuar ministri i Punës dhe Mirëqenies Sociale, Arban Abrashi.

“Në mbledhjen e parë të Qeverisë për 2015, aprovuam Planin e Punës së Qeverisë për 2015. Zhvillimi ekonomik në këtë plan pune është prioritet dhe zhvillimi i sektorit privat në veçanti. Do të punojmë shumë që ta zbatojmë programin ekonomik të premtuar. Në baza të rregullta do të raportojmë për realizimin e premtimeve, siç ishte rasti me projektligjin për ‘Trepçë’-n, që e bënë atë ndërmarrje shtetërore. Duhet të kthejmë shpresën se në Kosovë mund të jetohet, që të ndalim ikjen e të rinjve nga Kosova.

Ne në Ministrinë e Financave do të koordinohemi ngushtë me kolegen time znj. Bajrami nga Ministria e Tregtisë dhe Industrisë për ta krijuar ambientin e nevojshëm për zhvillim të sektorit privat. Do të kërkojmë bashkërendim të aktiviteteve me resorët e tjerë të Qeverisë, siç është Ministria e Drejtësisë dhe ministritë e tjera, si dhe me gjyqësorin, që të rritet efikasiteti i trajtimit të lendeve të natyrës ekonomike.

Do t’i involvojmë komunat, që ato të luajnë rol të rëndësishëm në plotësimin e kushteve që kërkohen nga investitorët. Ministri i Punës, z. Abrashi, po punon intensivisht që të arrijmë marrëveshje me vendet e BE-së për punësim të përkohshëm të punëtorëve tanë në mënyrë të organizuar”, ka shkuar Hoti në profilin e tij në “Facebook”.