Prezantohet plani rregullues “Fidanishtja 2”

/2L ONLINE/ – Drejtoria për Urbanizëm dhe Mbrojtje të Mjedisit e ka hapur dëgjimin publik për planin rregullues të lagjes “Fidanishte 2”, pas prezantimit të draftit nga kompania projektuese “INSI” e Prishtinës, për t`iu dhënë mundësi qytetarëve që gjatë tridhjetë ditëve të ardhshme t`i paraqesin kërkesat, vërejtjet dhe sugjerimet e tyre në këtë dokument të planifikimit hapësinor, në mënyrë që ai të jetë sa më i pranueshëm.

Rexhep Kadriu, nënkryetar i Komunës, i cili ka marrë pjesë në prezantimin e draftit, ka thënë se planet rregulluese janë të nevojshme për planifikimin e ndërtimit të infrastrukturës dhe dhënien e lejeve ndërtimore dhe i ka inkurajuar pronarët, të cilët preken drejtpërdrejt nga ky plan, që t`i paraqesin vërejtjet e tyre.

“Komuna e Gjilanit, gjithmnonë i ka marrë paraysh kërkesat e qytetarëve dhe është mundur që ato t`i përfshijë në planet rregulluese dhe zhvillimore të qytetit”, ka thënë Kadriu, duke shtuar se pjesëmarrja e qytetarëve në këtë proces e ndihmon Komunën që të bëjë plane sa më të mira.

Fadil Sherifi, shef i Sektorit të Planifikimit Hapësinor në DUMM, ka thënë se Komuna e ka për obligim t`i bëjë planet rregulluese dhe zhvillimore, të cilat mund të rishikohen pas 5 përkatësisht 8 vitesh.

Zona urbane shtrihet në një sipërfaqe prej 2002 hektarësh dhe pjesa më e madhe e saj, rreth 80 për qind, është e mbuluar me plane rregulluese, ndërkohë që do të vazhdohet me pjesën tjetër.

Në pikat kryesore, planin rregullues e ka prezantuar Ismajl Baftijari, ndërkaq detajet tjera i kanë paraqitur ekspertët e fushave përkatëse, Valon Gërmizaj, Shaban Neziri, Lulëzim Kryeziu, Arben Arifi dhe të tjerë. /2L ONLINE/