Presidentja Jahjaga priti kreun e FHK-së

Presidentja e Republikës së Kosovës, zonja Atifete Jahjaga, priti në takim një delegacion të Federatës së Hendbollit të Kosovës, të kryesuar nga presidenti i Federatës, Eugen Saraçini.

Delegacioni i FHK-së e njoftoi presidenten Jahjaga për aktivitetin e Federatës dhe Saraçini prezantoi të arriturat e deritashme duke theksuar se Federata e Hendbollit të Kosovës, është pranuar si anëtare e barabartë e Federatës Evropiane të Hendbollit dhe njëkohësisht edhe e Federatës Ndërkombëtare të Hendbollit. Saraçini tha se hendbolli i Kosovës ka bërë një hap të madh në ndërkombëtarizimin e sportit të Kosovës dhe theksoi rëndësinë e përkrahjes së institucioneve të vendit në këtë drejtim.

Delegacioni e informoi presidenten edhe për aktivitetet dhe angazhimet e FHK-së në të ardhmen.

Presidentja Jahjaga duke e përgëzuar Federatën e Hendbollit të Kosovës për suksesin e arritur tha se ndërkombëtarizimi i sportit të Kosovës, në përgjithësi ndihmon të rinjtë e të rejat e Kosovës, që të përfaqësojnë vendin e tyre në arenën ndërkombëtare, por gjithashtu edhe të bëhen pjesë e barabartë në çdo fushë me të gjithë bashkëmoshatarët e tyre kudo në botë.

Ajo tha se Kosova po bën përpjekje të vazhdueshme që të bëhet anëtare e plotë e të gjitha institucioneve ndërkombëtare si shtet kontribuues për paqen, stabilitetin dhe sigurinë e përgjithshme.

Ajo tha se institucionet e Kosovës janë fuqishëm të angazhuara për të mbështetur aktivitetet e çdo fushe, qoftë të sportit, kulturës e artit si dhe i vlerësoj lartë të gjitha të arriturat në skenën ndërkombëtare.

Delegacioni i FHK-së në fund të takimit i dhuroi Presidentes Jahjaga flamurin e kësaj Federate dhe një monografi të Hendbollit të Kosovës, që përmbledhë aktivitetin 60-vjeçar të këtij sporti në Kosovë.