Presidentja Jahjaga fton komunitetin rom që të jenë më aktiv

Presidentja e Kosovës Atifete Jahjaga, u ka kërkuar sot komuniteti rom që të jenë më aktiv dhe të shprehin kërkesat e tyre dhe nevojat përmes Këshillit Konsultativ për Komunitete. Presidentja e Kosovës Atifete Jahjaga, u ka kërkuar sot komuniteti rom që të jenë më aktiv dhe të shprehin kërkesat e tyre dhe nevojat përmes Këshillit Konsultativ për Komunitete, këshill ky që udhëhiqet nga vetë presidentja Jahjaga.

Këtë, ajo ua tha gjatë një takimi që pati me përfaqësuesit e komunitetit rom në Kosovë, që udhëhiqej nga Kujtim Paçaku, deputet i Kuvendit të Kosovës, në përbërje të të cilit ishin edhe përfaqësues të partisë politike rome dhe përfaqësues të shoqërisë civile, në Ditën Memoriale të Romëve në Kosovë.

Takimi i delegacionit të komunitetit rom me Presidenten u bë edhe në shënimin e Ditës Ndërkombëtare të Romëve.

Në një komunikatë për media që ka ardhë nga presidenca, thuhet se presidentja Jahjaga i uroi përfaqësuesit e komunitetit rom për Ditën Memoriale të Romëve duke theksuar vlerën e shoqërisë së Kosovës në respektim të diversitetit etnik, kulturor e fetar.

Jahjaga citohet të ketë thënë se është me shumë rëndësi integrimi i të gjitha komuniteteve që jetojnë në Kosovë, përfshirë edhe komunitetin rom, në shoqërinë dhe institucionet e vendit, por theksoi se përmirësimi i kushteve të jetesës dhe ofrimi i perspektivës më të mirë për të gjithë qytetarët, pa dallim, është përparësi e punës së institucioneve të vendit.

Në anën tjetër përfaqësuesit e komunitetit rom e falënderuan presidenten Jahjaga për urimet për Ditën e Romëve dhe për pritjen në këtë ditë të shënuar për ta dhe theksuan rëndësinë e mbështetjes së institucioneve të vendit për komunitetin rom.

Ata theksuan nevojën që ky komunitet ka në fushën e arsimit dhe edukimit dhe në gjithashtu edhe në ofrimin e kushteve për punësim.