Presidenti zgjedhet sot!

Kuvendi i Kosovës sot (e premte), në orën 11:00, do të mbajë seancë të jashtëzakonshme, në të cilën do ta zgjedhë presidentin e ri të vendit.Kandidat i koalicionit qeverisës për postin e presidentit është lideri i Partisë Demokratike të Kosovës (PDK), Hashim Thaçi, i cili gëzon mbështetjen e numrit më të madh të deputetëve të Lidhjes Demokratike të Kosovës dhe komuniteteve pakicë. Thaçi kundërkandidat për këtë post do ta ketë deputetin e PDK-së, Rafet Rama. Por, kjo kandidaturë më shumë shihet vetëm si nevojë për plotësimin e procedurave ligjore e kushtetuese.

Në seancën sotme të Kuvendit të Kosovës duhet të formohet komisioni i veçantë, i cili do të verifikojë nëse dy kandidatët e propozuar i plotësojnë kriteret kushtetuese për të qenë të propozuar si kandidatë për president. Në rast se konstatohet pozitivisht, atëherë kërkohet konstatimi nëse ekziston kuorumi i mjaftueshëm prej së paku 80 deputetëve të pranishëm në seancë.

Sipas nenit 86 të Kushtetutës, që sqaron mënyrën e zgjedhjes së presidentit dhe kuorumin e nevojshëm, gjatë seancës për zgjedhjen e kreut të shtetit duhet të jenë së paku dy të tretat e deputetëve të Kuvendit, apo 80, nga 120 deputetë sa janë gjithsej. Nëse asnjë kandidat nuk merr shumicën e votave, prej dy të tretave të deputetëve, në dy votimet e para organizohet votimi i tretë mes dy kandidatëve, të cilët kanë marrë numrin më të lartë të votave në votimin e dytë dhe kandidati që merr shumicën e thjeshtë të votave të të gjithë deputetëve, apo 61 prej tyre, zgjedhet president i Kosovës.

Ndërkohë, nëse edhe në votimin e tretë asnjë kandidat nuk arrin t’i marrë votat e nevojshme për t’u zgjedhur president, shpërndahet Kuvendi dhe shpallen zgjedhjet e reja, të cilat duhet të mbahen brenda 45 ditëve.