Presidenti i FFK-së mirëpret drejtuesit e klubeve të promovuara në kategori më të larta

Presidenti i Federatës së Futbollit të Kosovës, Agim Ademi, ka pritur drejtuesit e klubeve që siguruan promovimin në një kategori më lart në garat e organizuara nga FFK-ja, duke i përgëzuar për suksesin e arritur dhe punën e bërë ndër vite.

Ademi vlerësoi se promovimi i këtyre klubeve është rezultat i përkushtimit, organizimit dhe zhvillimit të qëndrueshëm, si nga drejtuesit ashtu edhe nga stafet e tyre.

“Ky promovim është rezultat i një pune të gjatë, i përkushtimit të vazhdueshëm dhe i besimit në projektet sportive që secili klub ka ndërtuar ndër vite. Këto suksese dëshmojnë qartë se puna, organizimi dhe vizioni i mirëfilltë sportiv gjithmonë shpërblehen me arritje të merituara,” ka deklaruar Ademi.

Në Superligë janë promovuar FC Vushtrria dhe FC Feronikeli 74, ndërsa në Ligën e Parë promovimin e siguruan FC Mitrovica dhe FC Lepenci. Në Ligën e Dytë do të garojnë FC Dardana 10 dhe FC Istogu 03.

Ndërkohë, në Superligën e Futsallit janë ngjitur FC Policia dhe FC Rahoveci, derisa në Superligën e Vajzave është promovuar FC 2 Korriku.

Presidenti i FFK-së u ka uruar klubeve të promovuara suksese në kategoritë e reja, duke shprehur besimin se ato do të vazhdojnë të forcojnë organizimin profesional, të kontribuojnë në zhvillimin e kampionateve cilësore dhe të japin një rol të rëndësishëm në avancimin e futbollit dhe futsallit në Kosovë. /2LONLINE/