Premierë në Gjilan: Radiodrama “Sfinga e Gjallë” e Rexhep Qosjes

Pas një mungese të gjatë të prodhimeve radiofonike dramatike në Kosovë, më 18 qershor në ora 19:00 do të jepet premierë radiodrama “Sfinga e Gjallë” e Rexhep Qosjes, në valët e Radio Energji 103.3 FM.

Realizimi vjen në kuadër të nismës kulturore “Zëri i Trashëgimisë – Radio Drama nga Dramaturgjia Kosovare”, me drejtues Shkelzen Berishën, që synon të rikthejë në vëmendjen e publikut veprat e rëndësishme të dramaturgjisë kosovare përmes mediumit audio.

Shkelzen Berisha drejtues i projektit, tha për Portalin 2LONLINE se projekti shënon një moment të veçantë për jetën kulturore të Gjilanit, pasi konsiderohet ndër përpjekjet e para serioze për rikthimin e radio-dramës në Kosovë pas shumë vitesh, si dhe radio-drama e parë e realizuar në qytetin e Gjilanit, duke hapur një kapitull të ri në promovimin e letërsisë dramatike dhe trashëgimisë kulturore përmes formateve bashkëkohore.

Sipas Berishës kjo nuk do të mbetet një iniciativë e vetme. “Zëri i Trashëgimisë – Radio Drama nga Dramaturgjia Kosovare” është konceptuar si një nismë afatgjate që synon të sjellë edhe vepra të tjera të rëndësishme të dramaturgjisë kosovare në formatin e radiodramës, duke krijuar një arkiv të qëndrueshëm audio për brezat e ardhshëm.

Premiera do të transmetohet drejtpërdrejt në Radio Energji 103.3 FM, si dhe përmes transmetimit online në rrjetet sociale, të enjten, 18 qershor, në ora 19:00. Ky projekt është mbështetur nga Ministria e Kulturës, Rinisë dhe Sportit e Republikës së Kosovës.  /2LONLINE/