Praktika gjatë studimeve do duhej të njihet si eksperiencë

/“Se çfarë ardhmërie do të ketë një popull të mirë apo jo, varet se si do të edukojë dhe do të arsimojë brezin e ardhshëm“/

/2L ONLINE/ – Studentët që studiojnë në programet e edukimit në drejtimet përkatëse, gjatë studimeve katërvjeçare ndjekin mësimin praktik nëpër institucione të ndryshme arsimore. Praktika pedagogjike është e përcaktuar me planprograme mësimore të fakultetit ku si rrjedhojë ajo është edhe obliguar. Studentët gjatë studimeve çdo vite iu nënshtrohen ndjekjes së praktikës e cila zgjatë 20 javë gjatë gjithë ciklit të studimeve themelore katërvjeçare.

Kjo praktike e cila zhvillohet nëpër institucione arsimore si në shkolla të ciklit të ulët (institucione parashkollore-çerdhe), dhe shkolla të mesme të ulët duke përfshirë edhe studentët që studiojnë në programet e ndryshme lëndore nuk ju njihet dhe nuk ju shërben si përvojë pune.

Praktika që realizohet gjatë studimeve vlerësohet dhe mbikëqyret nga e ana e profesorëve të fakultetit si dhe mësimdhënësi mentor që zhvillon procesin mësimor në klasë. Gjatë ndjekjes së praktikës studentët nën mbikëqyrjen e mësimdhënësve mentor dhe profesorëve të fakultetit vijojnë procesin mësimore sipas plan programeve mësimore duke treguar kureshtje për mësimdhënie dhe nxënie, tregojnë entuziazëm për angazhim, janë korrekt në çështjet e vijimit, saktësisë e përgjegjësisë, paraqesin vullnet për bashkëpunim, krijojnë raporte të mira me nxënësit, drejtojnë aktivitetet në mënyrë të suksesshme si dhe paraqiten në mënyrë profesionale si nga veshja e ashtu edhe nga higjiena.

Në procesin e ndjekjes së praktikës studentët përdorin metodat dhe teknikat më bashkëkohore të mësimdhënies të cilat edhe rezultojnë me një mësimdhënie dhe mësimnxënie të suksesshme. Studentët e tillë anashkalohen duke mos ju njohur e as vlerësuar praktika pedagogjike edhe pse në fakt këta pasurojnë përgatitjen e tyre duke fuqizuar profesionin e tyre.

Si nevojë dhe domosdoshmëri e kësaj situate që gjenden këta edukues të brezave të rinj kjo çështje duhet të jetë e diskutueshme dhe e debatueshme pasi mbështetët dhe argumentohet në mënyrë të racionale.
Përgatitja e qytetarëve të shoqërisë në mënyrë demokratike të cilët mendojnë në mënyrë kritike, të aftë për të zgjidhur probleme që nga ato në mjedisin më të ngushtë, e në atë në nivel komunal, kombëtar e deri global janë vëmendje e procesit të sotëm të edukimit./2L ONLINE/

Betim Sherifi
I diplomuar ne Fakultetin e Edukimit