Policia e Kosovës sqaron arrestimin e aktivistit të Vetëvendosjes

Policia e Kosovës me anë të një sqarimi për media ka deklaruar se Drejtoria Rajonale në Prishtinë me njësitet e saja policore, ka realizuar një urdhëresë të lëshuar me 14 korrik 2015 nga Gjykata Themelore e Prishtinës, lidhur me shoqërimin e një personi (K. D.) të kërkuar për paraqitje në seancën e shqyrtimit gjyqësor, në gjykatë.

“Policia e Kosovës është institucion profesional në realizimin dhe përmbushjen e detyrave konform procedurave të parapara ligjore, duke përfshirë edhe realizimin e urdhëresave të lëshuara nga organet e drejtësisë.

Prandaj, konsiderojmë se opinioni publik duhet të informohet drejt dhe korrekt, se Policia e Kosovës ka zbatuar urdhëresën e lëshuar nga organet e drejtësisë e cila është njëra nga detyrat e përcaktuara me ligj për Policinë e Kosovës”, thuhet në sqarimin e PK-së.

Ndryshe, Kushtrim Dakaj është aktivist i Lëvizjes Vetëvendosje i cili është arrestuar mëngjesin e sotëm. Lidhur me këtë pati reaguar edhe VV-ja, e cila kërkoi lirimin e menjëhershëm të Dakajt.

http://www.indeksonline.net/?FaqeID=2&LajmID=172254