Policia e Kosovës në gjendje gatishmërie për protestën e 9 janarit

Policia e Kosovës bëri të ditur për Telegrafin se i kanë bërë të gjitha përgatitjet dhe planifikimet e nevojshme, duke hartuar plane konkrete operative për ruajtjen e rendit dhe sigurisë për protestën e së shtunës të partive opozitare.

Baki Kelani, zëdhënës i Policisë së Kosovës tha për Telegrafin se Policia ka kapacitete të menaxhojë çfarëdo lloj situate e cila mund të paraqitet, duke u kujdesur edhe për sigurinë e përgjithshme dhe lirinë e lëvizjes.

“Policia e Kosovës me kohë bën të gjitha përgatitjet dhe planifikimet e nevojshme duke hartuar plane konkrete operative për ruajtjen e rendit dhe sigurisë publike, duke përfshirë: sigurinë e përgjithshme në Republikën e Kosovës, mbajtjen e rendit dhe sigurisë publike dhe zbatueshmerinë e ligjit, shtimin e masave të sigurisë për të garantuar rend, qetësi dhe siguri publike, para, gjatë dhe pas protestës”, tha ai.

Ndryshe, më 9 janar partitë opozitare do të protestojnë kundër marrëveshjes për Asociacionin e komunave serbe dhe demarkacionit me Malin e Zi.

Përfaqësues të partive opozitare dje theksuan se protestat e opozitës nisin më 9 janar, ndërsa përfundimi i tyre do të jetë kur të bie Qeveria.