Policia e Kosovës apelon që të festohet me zemër e jo më armë!

Me rastin e festave të fund vitit, si dhe me qëllim të sensibilizimit të opinionit për kremtimin e festave pa incidente e eksese, policia në Viti ka vazhduar edhe sot me shpërndarje të afisheve në kuadër të fushatës “Festo me zemër jo me armë”.

Gjithashtu janë shpërndarë fletëpalosje – këshilla për qytetarët, në mënyrë që ata t’i marrin masat e nevojshme që festat e fund vitit të kalojnë pa incidente.

Në vazhdën e kësaj fushate, në bazë të një njoftimi, patrullat e Policisë janë të fokusuara në ruajtjen e rendit dhe qetësisë publike në mbarë rajonin për sigurinë e secilit qytetarë.

Pjesë e kësaj fushate është edhe shtimi i prezencës policore në ambiente të hapura, në sheshe, në lokale të ndryshme, ku mbahen organizime festive, si dhe në trafikun rrugor që festat e fund vitit të kalojnë pa incidente dhe aksidente në rrugë.

“Policia përmes kësaj fushate apelon te qytetarët që të bëjnë kujdes për sigurinë e tyre dhe të tjerëve, me theks të veçantë që përdorimi i armëve në festa dhe gëzime mund të shndërrohet në tragjedi, po ashtu është edhe e ndaluar me ligj. Personat e mitur duhet të rrinë larg nga armët e zjarrit, përdorimi i armëve lejohet vetëm në vendet e sigurta dhe të licencuara për përdorim ( Poligon), personat fizik që kanë armë personale dhe të cilët posedojnë leje nga MPB duhet t’i mbajnë në vend të sigurt”, thuhet në një njoftim të policisë.

Gjithashtu, bëhet e ditur se shitja e fishekzjarrëve është e lejuar nga 19 deri me 31 dhjetor, ndërsa përdorimi nga data 26 dhjetor deri më 2 janar 2022. /2LONLINE/