Poezia “Një portret fanar mbi det” e Mehmeteli Rexhepit merr çmimin e parë në takimin letrar “Metamorfozat e vjeshtës”

Poezia e Mehmeteli Rexhepit, “Një portret fanar mbi det”,  merr çmimin e parë në takimin letrar “Metamorfozat e vjeshtës”, organizuar nga Shoqata e Shkrimtarëve dhe Krijuesve “Ramadan Musliu” në Viti,

“Më 22 tetor 2025 në takimin letrar, tashmë tradicional, “Metamorfozat e vjeshtës”, nga Shoqata e Shkrimtarëve dhe Krijuesve “Ramadan Musliu” në Viti, pata nderin që juria e kësaj veprimtarie poetike, poezisë sime “Një portret fanar mbi det”,  t`i jep çmimin e parë. Respekte të ndërsjellta për artin e shkruar”, ka thënë autori i poezisë fituese, Mehmetali Rexhepi.

Ja poezia fituese:

Një portret fanar mbi det

Faqet
verdhë skuqjet e pjeshkës
Sytë
llambadarë të drithëruar rrëshqasin
hapur e fshehur relieveve të butë të vashës
Buzët
në buzë gacat e qershisë
Mendja
një fanar universi që fluturon e nuk fiket
Flokët
një pyll i paprerë dhe strofka që i lëpin era
Veshët
krisma kakofonish dhe mjaltë melodish
Balli
digë e shkrirjes së sumbullave prej kripës
Rrudhat
të vjelat e të mbjellave përgjatë hullive hamulloresh
Vetullat
lojëra me vija harqesh e ngjyra ylberesh të piktorëve
Hunda
mes faqesh një hinkë e kullimit të erërave
Lotët
vrushkuj reshjesh vranësirash vajesh të shfryera
Mjekra
rrëza e kafkës gufuese vegjetimesh të dendura
të thinjura apo të zeza
Buzëqeshja
shkëlqim drite me ar çastesh thurje e praruar
ujëvarë e fllad shpirti
akull-shkrirësja e një dëshpërimi
engjëllushë që mbi qepalla zbriti
dhe pas një vranësire
e trazuar lypi
degë hareje
fluturoi dhe iku