Poetja Klejda Plangarica fituese e çmimit “Muza e Agimit” 2026
Ora e Madhe Letrare “Muza e Agimit” 2026, ka qenë aktiviteti i radhës që është organizuar, në kuadër të Manifestimit “Ditët e Agimit”, në të cilin aktivitet me poezitë e tyre janë paraqitur poet nga vise të ndryshëm për të konkurruar për çmimin kryesor.
Pasi u lexuan nga vet krijuesit poezitë e tyre konkurruese, Juria e Orës Letrare, në përbërje Zyrafete Shala, kryetare e Jurisë, Nexhat Rexha dhe Mehmetali Rexhepi, anëtarë, shpalli fituese të çmimit “Muza e Agimit” poeten nga Tirana, Klejda Plangarica, e cila u paraqit me poezinë e saj “Puhi drite”.
Për ndryshe, juria vlerësuese me vendin e dytë vlerësoi poetin nga Malisheva, Mehdi Krasniqi, me poezinë, “Shpërfillje”, derisa me vendin e tretë, u vlerësua poetja nga Gjilani, Albina Idrizi me poezinë “Ka ditë si kjo ditë”.
Përndryshe, edhe ky edicion i “Muzës së Agimit”, që u organizua nga Shoqata Kulturore “Ditët e Agimit”, Zhegër dhe Ars Clubi “Beqir Musliu”, Gjilan, u mbajt në SHMU “Agim Ramadani”, Zhegër, ku u hap simbolikisht me zërin e heroit të kombit, Agim Ramadani, duke bashkëbiseduar me bashkëshorten e tij, ku vëhet në theks fjalia: “Ne po fitojmë!”.
Në emër të familjarëve të heroit të artdashësit e pranishëm i përshëndeti vëllai i Agimit, Jashar Ramadani, derisa poetja Linditë Ramushi Dushku, deklamoi poezinë përkushtuese për Agim Ramadani, shkruar nga shkrimtari Ibrahim Kadriu. Aktivitetet e këtij manifestimi vazhdojnë tutje ku veçojmë tubimin qendror “I këndojmë Agimit”. /2LONLINE/
Poezia fituese
PUHI DRITE
Mos u spraps!
Nëse ajo fije e hollë mendimi vetëtiu te ti –
Bëzaje fort, vishi fjalë,
Hidhu asaj rruge pa fre,
Mos u spraps!
Nëse një pikë ta ndal rrugën, të vë gardh –
Ti shtoji dy të tjera pas…
Ç’do kishim bërë në jetë pa retiçencat?!
Si do t’i kishim çarë një shteg mendimit
Për të lundruar larg?!
Mos u spraps
Nga presjet tinëzake rrugës,
Ndalesë e shkurtër janë.
Një bulëz sysh, një rigë fryme…
Mos u spraps!
Ajo fije e hollë mendimi
Puhi drite është… Jo flakë!
/Klejda Plangarica/