Po mbahet “Kupa e Anamoravës” 2026 në Kamenicë

“65 nxënës të talentuar nga Gjilani, Kamenica, Vitia, Novobërda, Presheva, Bujanoci, Kumanova dhe Shkupi po marrin pjesë në Olimpiadën Rajonale të Matematikës “Kupa e Anamoravës 2026”, e cila po zhvillohet sot në Kamenicë”, njofton Shoqata e Matematikanëve të Gjilanit.

Ky aktivitet po bashkon talentet më të mira të matematikës nga Anamorava dhe trevat shqiptare, duke krijuar një hapësirë të veçantë për garë, bashkëpunim dhe shkëmbim përvojash ndërmjet nxënësve dhe mësimdhënësve.

Përmes kësaj olimpiade synohet identifikimi, promovimi dhe zhvillimi i talenteve të rinj në matematikë, si dhe forcimi i lidhjeve arsimore ndërmjet komunave dhe qyteteve shqiptare në rajon, transmeton 2LONLINE.

Kupa e Anamoravës 2026 shënon edicionin e parë të kësaj gare, me synimin që të shndërrohet në një traditë të rëndësishme të matematikës shqiptare.

Matematika bashkon talentet shqiptare në Kamenicë, thuhet në fund të njoftimit të Shoqatës së Matematikanëve të Gjilanit.  /2LONLINE/