Peticion për anulimin e vendimit skandaloz të Kuvendit Komunal të Gjilanit, “Fshati i lumtur” t’i kthehet personave me aftësi të kufizuara

Nga: Fatmir Shurdhani  /menaxher i Handikos-it në Gjilan/

Dje kemi filluar një peticion me personat me aftësi të kufizuara dhe qytetarët e komunës se Gjilanit, i cili në momentin që do të përfundojë, do t’i përcillet Ministrisë së Administrimit të Pushtetit Lokal (MAPL), për anulimin e vendimit skandaloz e të dëmshëm të Kuvendit Komunal të Gjilanit, të datës 26 .06.2026.

Vendimi për tjetërsimin e qëllimit të ‘Fshatit Lumtur”, duke ia dhënë në shfrytëzim Këshillit të Bashkësisë Islame për ta jetësuar një qendër rajonale për KBI-në, është vendim skandaloz, i inicuar nga Alban Hyseni, i cili erdhi pa u respektuar as më i vogli kriter paraprak, pa asnjë debat publik e pa konsulta me OJQ-të.

Për ne, si përfaqësues të personave me aftësi të kufizuara, tjetërsimi i këtij projekti me inicim të Alban Hysenit, më së buti është i papranueshëm, për të mos përdorur kualifikime të tjera.

Është e dhimbshme edhe për vetë krerët e KBI-së në Gjilan, të cilët proklamojnë solidaritin, mbështetjen dhe ndihmën ndaj rasteve sociale, e në anën tjetër, tentojnë t’ua marrin tre hektarë tokë e nëntë objekte përcjellëse personave me aftësi të kufizuara, duke e pranuar tjetërsimin e projektit me lehtësi të padurueshme.

Apeloj të gjithë qytetarët e Gjilanit që ta nënshkruajnë këtë peticion, i cili ka filluar dje, më 8 korrik 2026, në mënyrë që t’i kthehet projekti personave me aftësi të kufizuara.   /2LONLINE/